Kreu i PD, Sali Berisha edhe sot e ka mohuar që të njohë personalisht Agron Nezë, ish-agjentin e SHIK-ut që del si “Personi A” në dosjen amerikane për përfshirjen në korrupsion të ish-zyrtarit të FBI-së, Charles McGonigal.
Neza është shqiptaro-amerikani me banim në Nju Xhersi që në dosje nënvizohet se i ka paguar McGonigal 225 mijë euro për shërbime që ende janë të paqarta, por që dyshohet se kanë lidhje me darkat e përbashkëta në Tiranë dhe Uashington me kryeministrin shqiptar Edi Rama.
Edi Rama mohoi të ketë lidhje me Nezën përveç takimeve ku ai ka qenë i pranishëm dhe përdori alibninë se ish-agjenti SHIK është tropojan me origjinë njëjtë si Berisha, madje duke nxjerrë në mediat e majta edhe një foto të tij përkrah liderit të opozitës.
Por Berisha i ka qëndruar deklaratës së tij të parë për Nezën edhe sot duke thënë se nuk e njeh personalisht dhe se ai është një nga 100 mijë shqiptarët që sot kanë në telefonat e tyre ose në arkiva një foto me kreun e PD.
“Rama nuk ishte i verbër, veprimet i ka bërë me përllogari, nuk ka fshehur qëllimet e tij pro ruse. Ne jemi këtu për të deklaruar se ky parlament nuk zhvillon më punime pa e ndarë këtë që ka goditur Shqipërinë. U themi ju se ka goditur rëndë dhe opinionin perëndimor. Largimi i Ramës është kushti i të gjitha kushteve. I kam njohur të tjerët, dhe jo këtë. I kam njohur familjarë të tjerë. Agron Nezën, se ka një fotografi me mua. Mund të jenë 100 mijë shqiptarë dhe jo shqiptarë që kanë fotografi me Sali Berishën, por kjo s’do të thotë se i njoh. Njoh shumë nga familjarët e tij, por atë se njoh. Ka njeri që akuzon veten e tij? E kupton veprimin e tij. Ai do bëjë deklarata që të lehtësojë veten e vetë”, tha Berisha sot jashtë sallës së Kuvendit.
