Çështja e arrestimit të ish-zyrtarit të FBI-së, Charles McGonigal, i akuzuar për korrupsion dhe marrjen e pagesave për të lobuar dhe ndryshuar vendime të SHBA-ve nga oligarkë rusë dhe dyshimet për pagesa nga ana e kryeministrit Edi Rama, ka bërë që të ndizet debati në Kuvend.
Deputetët e Partisë Demokratike dhe kreu i saj Sali Berisha kanë bllokuar foltoren në Kuvend duke kërkuar llogari nga mazhoranca për skandalin e korrupsionit dhe lidhjen e Edi Ramës me Charles McGonigal.
Sipas Berishës “këto ditë Shqipëria gjendet në epiqendër të një cikloni që do të poshtëronte çdo vend të madh”.
“Kryeministri, ministra dhe këshilltarë janë të implikuar në një aferë korruptive, në korruptimin e njërit prej njerëzve në SHBA. Prej muajsh një juri ka urdhërua hetimin e çdo mesazhi, çdo takimi, çdo dhuratë-udhëtim e gjithçka tjetër mes McGonigal-Duçkës-Nezës dhe Edi Ramës. Kjo juri e citon në vendimin e saj në mënyrë të përsëritur Edi Ramën. Skandali shpërtheu në arrestimin e McGonigal nga FBI, i cili akuzohet se në raport me kryeministrin e Shqipërisë, ai ka fshehur dhe ka manipuluar e falsifikuar dokumente. Akuzohet se ky njeri i pafytyrë ka marrë porosi me para nga zyra e kryeministrit shqiptar për të hetuar lobimin e opozitës”, tha Berisha.
Në vijim kreu i PD shtoi se opozta nuk do ta lëshojë Kuvendin deri sa Edi Rama të dalë dhe të japë dorëheqjen për aferën që po heton drejtësia amerikane.
“Jemi këtu ne, ne qëndrojmë sot edhe deri pasnesër në drekë po deshe ti. Sepse ky kryeministër, ka kryer një krim të shëmtuar. Nuk mund të ketë debat tjetër veç këtij, shqiptarët duhet të marrin vesh të vërtetën, Edi Rama të vijë këtu, ose të shpallë dorëheqjen dhe të dëshmojë në SHBA. Çfarë kërkoni ju të ndodhë më shumë se kaq. E dini ju se çfarë ishte roli i McGonigal. E dini që Damiani juaj është zëdhënësi kryesor i interesave ruse në vend”, deklaroi ai.
