Bordi i i Transparencës, një organ i krijuar për të mbikëqyrur tregun e karburanteve por që është shndërruar prej mëse një viti në një “hall” për xhepat e shqiptarëve, ka vazhduar sot talljen me qytetarët.
Teksa të gjithë e prisnin shkrirjen e Bordit komunist në fund të janarit, ditën e djeshme ata morën vendimin për të rritur çmimin e karburantit në vend.
Ndërkohë në njoftimin e sotëm Bordi që rrjep shqiptarët, vjen me një ulje qesharake të çmimeve.
Teksa dje u vendos që një litër naftë të tregtohet me 210 lekë/litër, nga sot çmimi është ulur me 4 lekë duke shkuar në 206 lekë/litër.
Sipas njoftimit që hyn në fuqi në orën 18:00, benzina do të kushtojë 1 lekë më lirë sesa në 24 orët e fundit, duke u shitur me 191 lekë/litri, ndërsa i pandryshuar mbetet çmimi i gazit në 69 lekë/litri.
Këto ndryshime të çmimeve nga Bordi i Ramës vijnë në kohën kur prej më shumë se një muaji çmimi i naftës në bursën ndërkombëtare është në “pikiatë” dhe operatorët e tregut pohojnë se nëse Bordi nuk do të ndërhynte, çmimet do të ishin të paktën 5% më lire.
Njoftimi i BT:
Referuar të dhënave lidhur me bursën Platts të datës 25.01.2023, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 879, -13 nga data 24.01.2023, $/ Ton, ndërsa çmimi i Gazoilit/Diesel është 947, -31 nga data 24.01.2023, $/Ton. Kursi i këmbimit i BSH ka pësuar ulje të lehtë në 107. 51 (-0.05 nga data 24.01.2023).
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 206 lekë/litri, ndërsa i shitjes me shumicë jo më shumë se 194 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 191 lekë/litri, ndërsa i shitjes me shumicë jo më shumë se 179 lekë/litër.
Çmimi i shitjes me pakicë i nënproduktit gaz, të jetë 69 lekë/litri me pakicë dhe i shitjes me shumicë 57 lekë/litër për automjetet.
Çmimi i gazoilit për peshkim është vendosur 113 lekë/litër.
Çmimet e caktuara nga Bordi do të hynë në fuqi në datë 26 Janar, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
