Vajza e re nga Kenia, Joy Aoko e cila u dhunua në Tiranë dhe prej 14 gushtit ndodhej në Spitalin e Traumës, ka lënë Shqipërinë për të vijuar mjekimin në spitalin Kenyatta.
Departamenti i Shtetit për Çështjet e Diasporës, në një deklaratë për redaksitë, tha se avioni që mbante zonjën Aoko, nënën e saj si dhe ekipin e saj mjekësor u largua nga Shqipëria herët të mërkurën dhe do të zbresë në aeroportin Ëilson rreth orës 18:30 në të njëjtën ditë.
“Ajo u shtrua në spital për trajtim dhe që atëherë është në gjendje kritike. Fatkeqësisht, ajo kishte nevojë për kujdes të specializuar neurologjik, i cili nuk ishte i disponueshëm në Shqipëri. Ndërsa ne vazhduam të nxisnim qeverinë e Republikës së Shqipërisë të kryente hetime të shpejta dhe të plota për të çuar autorët në paraburgim, e gjetëm në interesin më të mirë të zonjës Aoko, ta kthenin në shtëpi për të përfunduar rrugëtimin e saj të shërimit mes të dashurve të saj. .”, thuhet në deklaratë.
Që prej 14 gushtit të vitit 2022 vajza nga Kenia ndodhej e shtruar në spital pasi u dhunua brutalisht dhe u hodh nga kati i dytë i banesës ku jetonte në rrugën “Pandeli Evangjeli” në kryeqytet.
