Në vetëm 24 orë kryeministri Edi Rama ka ndryshuar qëndrim për raportin që ai ka me Charles McGonigal, ish-zyrtarin e lartë të FBI-së që është arrestuar për korrupsion dhe marrje të parave nga një oligark rus në lidhje me fshirjen e emrit të tij nga lista e sanksioneve të SHBA dhe marrjen e 225 mijë eurove nga ish-agjenti i SHIK, Arben Neza, pasi takoi bashkë me të shefin e qeverisë shqiptare.
Nga “janë gjëra që s’kanë as edhe një lidhje me mua” në cicërimën e tij të mbytur në Twitter një ditë pasi shpërtheu skandali i korruptimit të një zyrtari të inteligjencës amerikane, të cilin publikisht e ka quajtur “miku im”, në “po e takova, takova një zyrtar të lartë disa herë”, Ramës nuk dihet se cilën të vërtetë t’i besosh.
Madje në daljen e parë për mediat ku u vu mes shpatulla pas muri nga gazetarët për lidhjen me McGonigal, shefi i qeverisë nuk e mendoi dy herë por tentoi edhe ta hidhte poshtë faktin se e ka quajtur mik “lobistin” e tij nga Amerika.
“Shefi i Kundërterrorit i FBI-së ka qenë dhe është miku im nuk diskutohet”, thoshte Rama pak muaj më parë në një konferencë për mediat duke e mbrojtur kur emri i kryeministrit shqiptar nga dosja hetimore nuk ishte bërë ende publik, ndërsa sot u shpreh: “Fjala mik është shumë e madhe”.
“Unë kam përdorur gjuhën angleze për natyrën e marrëdhënies, ‘friendly relation’, marrëdhënie miqësore. Por jo mik që unë kam ndarë jetën me të”, shtoi më tej ai teksa zëri i dridhej dhe vrenjtja në fytyrë nuk gënjente aspak për sikletin që i ka krijuar ky skandal, që po bën bujë në mediat ndërkombëtare.
Por Rama nuk u ndal me kaq dhe për ta bërë të besueshme alibinë e tij futi në lojë edhe ish-agjentin e SHIK, Arben Neza duke tentuar t’i bëjë biografinë.
Dhe për ta bërë sa më mirë këtë, e nisi me vendin e lindjes së Nezës duke thënë se “Personi A” është nga Tropoja dhe mik i të ndjerit Azem Hajdari.
“Ka një të akuzuar për mosdeklarim dhe konflikt interesi në raport me mikun e tij shqiptaro-amerikan nga Tropoja, të cilin unë e kam takuar në takimin me të dhe me të cilin nuk kam pasur asnjë lloj lidhje tjetër përveç këtij raporti miqësor dhe këtyre shkëmbimeve krejtësisht pa asnjë interes tjetër me zyrtarin e lartë të FBI-së. Fola për zotin Agron, i cili e përsëris vjen nga Lëvizja Demokratike, shumë i afërt i të ndjerit Azem Hajdari, fis me Besnik Mustafajn, njerëz të nderuar pa diskutim, të cilin nuk e kam njohur më parë asnjëherë dhe me të cilin nuk kam shkëmbyer as letra, as interesa dhe asgjë tjetër, por e kam takuar vetëm në praninë e zyrtarit të lartë të FBI-së”, tha Rama.
Më tej madje kryeministri e cilësoi pagesën prej 225 mijë euro që Neza ka dorëzuar te ish-zyrtari i FBI-së si një borxh që McGonigal “i mori mikut të tij nga Tropoja, që jetojnë bashkë në Nju Jork”.
