Në banesën e familjes së Aleks Nikës, i cili mbeti i vrarë në protestën e 21 Janarit 2011 zbarkuan paraditen e sotme oficerët e policisë gjyqësore të sektorit të vrasjeve në policinë e Tiranës.
Lëvizja e organeve të drejtësisë erdhi pas deklaratës së xhaxhait të të ndjerit, Mark Nika, i cili pas takimit me kreun e SPAK Altin Dumani tha se zotëron prej muajit korrik 2022 audio-regjistrimin ku dëgjohet ish-komandanti i Gardës së Republikës, Ndrea Prendi që urdhëron oficerët të qëllojnë mbi protestuesit.
Mësohet se oficet gjyqësor kanë marrë në pyetje babain dhe xhaxhain e Aleks Nikës duke kërkuar që t’i dorëzojnë edhe kasetën si prova e re, që mund të ndikojë në ndryshimin e rrjedhës së hetimeve të rihapura në 2021 për dosjen e “21 Janarit”.
Por duket se familja Nika ka refuzuar që të dorëzojë audiopërgjimin te ta për llogari të Prokurorisë së Tiranës, me Mark Nikën që për Neës24 ka ripërsëritur deklaratën e djeshme ku tha se kanë besim për zbardhjen e së vërtetës vetëm te SPAK-u.
“Oficerët e Policisë Gjyqësore kërkuan që të njiheshin me kasetën, audio-regjistrimin. Kjo është pronë e jona, por kërkojmë që ta marrë vetëm SPAK. Kërkojmë që ta marrë vetëm SPAK, se vetëm aty kemi besim. Është i paanshëm. Kjo do të çonte drejt zbardhjes së çështjes”, u shpreh ai.
Xhaxhai i Aleksit ka vijuar më tej duke hedhur akuza të forta në drejtim të Prokurorisë së Tiranës, duke thënë se “nuk ka këllqe që të merret me këtë çështje”.
“Sot në shtëpinë e Aleksit erdhën hetues të prokurorisë gjyqësore për të marrë informacione për faktin se çfarë provash kemi siguruar ne. Çështja ka qenë e varrosur në Prokurorinë e Tiranës. Ata nuk kanë pasur vullnetin që çështja të hetohet. Kjo ndoshta jo nga paaftësia, por nga ndikimet politike, pasi ka influencime nga Berishizmi”, tha Mark Nika.
Ai ka shtuar më tej se ka shkuar privatisht në zyrën e kreut të SPAK dhe se Prokuroria e Posaçme sipas tij është i vetmi organ të cilit familja me mirëbesim do t’i dorëzonte kasetën.
“Kam shkuar privatisht, e respektoj sepse na priti. Ne shkuam dhe i kërkova që, a mund që çështja të merret nga SPAK. Ai na këshilloi që të respektojmë procedurat.Nuk jemi kundër dhënies së këtij materiali. Urdhrin për vrasjen e ka dhënë Andra Prendi, është me zë dhe figurë. SPAK është i vetmi që e ka në dorë këtë”, theksoi ai.
