Vetëm 24 orë pas takimit të xhaxhait Aleks Nikës, i cili mbeti i vrarë gjatë protestës së 21 Janarit 2011, me kreun e SPAK Altin Dumani, në banesën ku jeton familja e të ndjerit kanë zbarkuar forcat e rendit.
Mësohet se oficerë të policisë gjyqësore të sektorit të vrasjeve në Policinë e Tiranës i janë drejtuar banesës në Lezhë për të marrë në pyetje babain dhe xhaxhain e tij.
Kjo lëvizje e organeve të drejtësisë vjen pas deklaratës së xhaxhait të Aleksit, Mark Nika, i cili dje tha se ka në disponim kasetën e audioregjistrimit të “21 Janarit” ku dëgjohet të flasë ish-komandanti Ndrea Prendi.
Ai sqaroi se kaseta me audio-përgjim e cila është dërguar në SPAK nga gazetari Artan Hoxha, ka qenë pronë e familjes Nika dhe se kanë qenë ata vetë që ia kanë dërguar gazetarit.
Sakaq, Mark Nika kërkoi ditën e djeshme nga Dumani që dosja e rihapur e 21 Janarit t’i kalojë SPAK dhe të hetohet prej tyre pasi nuk ka besim te Prokuroria e Tiranës.
Më tej ai është shprehur se nëse hetohet nga SPAK përgjimet do t’ua dorëzojë të gjitha Prokurorisë së Posaçme Kundër Korrupsionin.
