Një shpërthim me lëndë plasëse ka ndodhur pak pas mesnate në verandën e një banese në rrugën “Ndoc Martini” në Tiranë.
Mësohet se rreth 30 gramë tritol është vendosur në shtëpinë e marrë me qira nga shtetasi Demir Cara. Fatmirësisht nuk ka persona të lënduar por shpërthimi ka shkaktuar vetëm dëme materiale.
“Më datë 22.01.2023, rreth orës 00:05, në rrugën “Ndoc Martini”, në verandën e banesës së shtetasit D. C., 34 vjeç, dyshohet se është hedhur një sasi e vogël lënde plasëse duke shkaktuar dëme të vogla materiale. Grupi hetimor po punon për zbardhjen e rrethanave të ngjarjes dhe identifikimin e kapjen e autorit”, njofton policia.
– Pista që po heton policia:
Mediat raportojnë se banesa është në pronësi të shtetases Zenepe Kamena, e cila ndodhet jashtë vendit. 34 vjeçari Demir Cara, i cili punon në ndërtim, ka gati një vit që e ka marrë shtëpinë me qira ndërsa ka dëshmuar se ky kërcënim nuk ka të bëjë me familjen e tij pasi nuk ka konflikte me askënd.
Ndërkohë, burimet e Abc News kanë bërë me dije se dyshohet se kërcënimi me tritol është për familjarë të pronares së shtëpisë, më konkretisht nipit të saj. Nga dëshmitë që ka marrë policia, dyshohet se shkak për këtë janë bërë borxhet e pashlyera nga nipi i Zenepes.
Mësohet se këto borxhe i ka pasur për shkak të lojërave të fatit. Sakaq, zona është pa kamera sigurie dhe nuk ka asnjë të dhënë deri më tani se si ka vepruar autori apo nëse ka pasur ndonjë bashkëpunëtor.
– Flet fqini i Demir Carës:
Fqinji i Demir Carës, të riut që iu vendos tritol pak pas mesnatës në verandën e shtëpisë që kishte marrë me qira në rrugën “Ndoc Martini” në kryeqytet, deklaroi se i riu nuk ishte njeri problematik.
Për mediat, ai u shpreh se Demir Cara jetonte në banesën me qira prej një viti. Sipas tij, i riu punonte në ndërtim, dhe nuk ishte njeri që kishte shfaqur probleme.
“Janë sjellë shumë mirë, se di që kanë probleme, çuni punon në ndërtim ndërsa të tjerët janë në pension, nuk kanë pasur asnjë lloj problemi. Këtu ka 25 vjet që banon s’ka pasur probleme ndonjëherë. I zoti i shtëpisë ka 25 vjet këtu, ndërsa qiranxhinjtë ka një vit, po janë njerëz të mirë, të rregull, se di që kanë probleme”, tha fqinji i Carës.
