Sot është përkujtuar përvjetori i dymbëthjetë i 21 janarit ku mbetën të vrarë 4 protestues,
Duke komentuar çështjen në edicionin e lajmeve në MCN TV, politologu Ilir Kalmeaj thotë se kryeministrit nuk i intereson zbardhja deri në fund e ngjarjes, pasi e di që përgjegjësia s’është vetëm e atyre që qëlluan në drejtim të protestuesve, por edhe organizatorit.
Kalemaj është i mendimit se Rama e ka kthyer ngjarjen në kremtuese, ku kryen herë pas here rituale simbolike për të fituar pikë elektorale.
“Jemi në vitin e 13-të që kur ndodhi ngjarja fatale e 21 janarit ku u vranë 4 qytetarë, dhe natyrisht ka pasur 12 vjet kohë z.kryeministër, ose së paku 10 vite që kur mori pushtetin, që të vendoste të gjitha instrumentet e drejtësisë, nga depozitimi i çështjeve në Prokurori deri në ndjekjen e çështjeve për të dhënë drejtësi për ngjarjen. Në vend të kësaj kryeministri është përpjekur për të luajtur me simbolikën, të marrë familjarët te Salla e Hartave, të bëjë atë ritualin e vendosjes së karafilave në rrugë dhe e shfrytëzon politikisht. Kryeministrit i intereson që kjo të kthehet në ngjarje kremtuese, që i sjell pikë elektorale, por që s’është mirë t’i shkohet deri në fund. Sepse nëse i shkohet deri në fund, përgjegjësia s’është vetëm e këmbëzës për të cilën u dhanë ato dënime, sado qesharake, 1 dhe 3 vjet, por edhe kush e ka shtyrë dhe organizuar eventin, që ishte vetë kryeministri, që pasi organizoi protestën e dhunshme nuk qëndroi aty. Disa thoshin që ishin te kafenetë përballë, disa që ishte te selia e partisë, por e ka ndjekur nga televizioni dhe e ka maksimalizuar për të fituar zgjedhjet”, tha Kalemaj.
Duke folur mbi provat e reja ,Kalemaj tha se është paradoksale që ato dalin në përvjetorin e 13-të, një ditë para ngjarjes. Ai vë në dukje se është në interesin e dyanshëm të PS e PD që ngjarja të mbahet pezull, apo të konsiderohet një kapitull i mbyllur.
“Sa herë ka evidenca të reja, rrethana apo prova të reja, nuk ka shkrim që parashkruhet mund të hapet çështja. Më duket paradoksale që dalin incizime në përvjetorin e 13-të, një ditë para ngjarjes. Nëse kanë ekzistuar pse s’janë vënë në dispozicion të drejtësisë, pse s’janë bërë publike. Mendoj që është në interesin e dyanshëm politik për ta mbajtur çështjen pezull, një pjesë për ta trajtuar në mënyrë propagandistike dhe pala tjetër për ta quajtur kapitull të mbyllur. Mazhoranca nuk është e interesuar të zbardhet deri në fund të ngjarja. Duke bërë pjesën e kremtimit, e bëjnë për të mobilizuar dhe për të mbajtur të rreshtuar votën e majtë, nga ajo e ekstremit të majtë, te ajo e social-demokratëve, liberal-demokratëve”, tha Kalemaj.
I pyetur nëse mendon se mund të rihapen hetimet për 21 janarin, Kalemaj thotë:
“Çështja është ende në proces. Nëse ka evidenca të reja, prova të reja, kemi një palë paditëse, mund të shkojë në SPAK dhe SPAK-u mund ta çojë te GJKKO-ja dhe mund të kemi më në fund përmbylljen e sagës. Kryeministri bën ritualin simbolik që i shërben për të marrë votat, jo vetëm të të afërmve të viktimave, por edhe të atyre që janë pjesë e koalicionit të majtë”.
Sa i takon provave të reja për inceneratorët, politologu jep këtë koment:
“Ka pasur akuza të reja për inceneratorin e Tiranës, që s’e ekziston. Është paradoks i trefishtë, nuk kemi inceneratorë, kemi depozitim në landfillë, kemi pronarë të inceneratorëve që janë në kërkim nga drejtësia, që marrin çdo ditë nga 85 mijë euro. Të gjitha këto janë shumë shqetësuese, 17 procedurat brenda ditës, që janë duke u gjykuar në SPAK, prandaj kemi një ish-ministër dhe një ish-deputet socialist prapa hekurave”.
Sa i takon komenteve të Ramës në Davos, Kalemaj tha:
“Lideri global natyrisht ka pak kohë të merret me rajonin apo nahijes sonë shqiptare në gadishullin ilirik, kështu që mund të merret me çështje globale, si lufta në Ukrainë, reperkursione të ngrohjes globale, si të zgjidhet paqja botërore etj. Kur të mbarojë pjesën e globalizmit, siç i tha kolegu i tij Vuçiç mund të ketë kohë, mundësi, që të merret pak edhe me politikat publike, politikat makro-ekonomike, të adresojë inflacionin, rritjen e çmimeve të konsumit, që kjo lëmosha që ka dhënë në prag të zgjedhjeve është shumë pak në raport me 540 milionë euro që ka marrë qeveria për shkak të inflacionit dhe tatimeve”.
