Është zbardhur ngjarja në Sarandë, ku u dhunua një 39-vjeçar.
Burime zyrtare nga policia bënë me dije se Gentian Omeri përfundoi i masakruar në spital me trauma në kokë, dhëmb e gisht të thyer, ndërsa rezultoi se ishte marrë peng dhe dhunuar nga 4 persona.
Lidhur me rastin janë arrestuar Pjetër Ndoj, Astrit Ndoj dhe u shpall në kërkim Alfred Ndoji ( 3 vëllezër). Në pranga dhe 2 djemtë e shtetasit Astrit Ndoji konkretisht shtetasit Aleksander Ndoj dhe Anton Ndoj.
“Në vijim të veprimeve dhe ndjekjes të pandërprerë nga shërbimet e Policisë, rreth orës 04:00, u bë lokalizimi në fshatin Shëndelli dhe prangosja e 4 autorëve të dyshuar, konkretisht e shtetasve:
-N., 30 vjeç (me precedent të mëparshëm kriminal në fushën e narkotikëve), A. N., 21 vjeç, A. N., 44 vjeç dhe A. N., 21 vjeç (të afërm të njëri-tjetrit), të gjithë banues në fshatin Shëndelli, Sarandë.
-Gjithashtu u bë shpallja në kërkim shtetasit A. N., 39 vjeç, banues në Shëndelli, Sarandë. Vijon puna për kapjen e tij.
Nga veprimet hetimore dyshohet se këta shtetas, në bashkëpunim me njëri-tjetrin, për motive të dobëta, kanë përplasur me dashje automjetin që drejtonte shtetasi G. O., të cilin e kanë plagosur duke e goditur me sende të forta, e më pas e kanë futur në automjetin e tyre, duke e mbajtur aty me forcë, dhe më pas e kanë lënë pa ndjenja, në rrugë.
Në cilësinë e provës materiale u sekuestruan 3 automjete që përdoreshin nga të arrestuarit dhe 7 aparate celulare.”,- sqaron policia.
Materialet hetimore i kaluan Prokurorisë pranë Gjykatës së Rrethit Gjyqësor Sarandë, për veprat penale “Plagosja e rendë me dashje”, “Heqja e paligjshme e lirisë” dhe “Shkatërrimi i pronës”, të kryera në bashkëpunim.
