Qyteti i Pogradecit dhe njësia administrative Buçimas me 5 fshatrat e saj prej mëse dy distësh nuk furnizohen me ujë të pijshëm.
Mësohet se shkak për ndërprerjen e furnizimit me ujë është bërë çarja e tubacionit kryesor të furnizimit, që është dëmtuar gjatë punimeve të firmës që po ndërton aksin rrugor që lidh qytetin me zonën turistike të Drilonit.
Defekti nuk është riparuar ende edhe pse prej dy ditësh punonjës të ujësjellësit janë angazhuar në terren për të bërë të mundur rikthimin normal të furnizimit me ujë për banorët dhe qindra biznese që gjenden aktualisht në vështirësi për funksionimin e tyre.
Nga Ujësjellësi i Pogradecit kanë bërë me dije se mesditën e sotme është arritur të riparohet defekti, por për shkak të presionit, tubacioni kryesor është dëmtuar sërish.
