Pas vizitës në Prishtinë, pesë emisarët ndërkombëtarë në dialogun Kosovë – Serbi shkuan në Beograd, ku kanë zhvilluar takimin e programuar me presidentin serb, Aleksandër Vuçiç.
Presidenca e Serbisë ka njoftuar se në takim marrin pjesë i dërguari i posaçëm i BE-së për dialogun mes Kosovës dhe Serbisë, Mirosllav Lajçak, dhe emisari amerikan për Ballkanin Perëndimor, Gabriel Escobar.
Përveç tyre të pranishëm janë edhe dërguari i posaçëm i Francës, Emmanuel Bonne, ai i Gjermanisë, Jens Plotner, dhe Francesco Talon, këshilltar i kryeministres së Italisë.
Ditën e djeshme, Vuçiç tha për mediat se këto do të jenë “një nga bisedimet më të rëndësishme” dhe se ai shpreson se “do të ketë përparim” në zgjidhjen e mosmarrëveshjeve mes dy vendeve.
Sakaq, paraditen e 20 dhjetorit pesë diplomatët qëndruan në Prishtinë ku u takuan me kryeministrin e Kosovës, Albin Kurti.
Pas këtij takimi Lajçak tha për mediat se delegacioni i emisarëve ndërkombëtarë ka pritur më shumë mirëkuptim rreth mundësive që ofron propozimi për normalizim të marrëdhënieve ndërmjet Prishtinës dhe Beogradit.
“Është shumë herët për të bërë deklarata dramatike, sepse, siç e dini, ne jemi në mesin e misionit tonë dhe do të vazhdojmë për në Beograd, kështu që nuk kam shumë çfarë të them. Por, dua të them se megjithatë, në këtë pikë, ne kemi pritur që të kuptohen më mirë mundësitë që i ofron ky propozim. Shpresoj të mbërrijmë atje, te mirëkuptimi i plotë, si dhe shfrytëzimi i plotë i potencialit që ka ky propozim. Ne do të vazhdojmë të punojmë në këtë”, tha Lajçak të premten në Prishtinë.
Ndërkohë, sipas mediave kosovare në takimin me Kurtin që zgjati më shumë se dy orë është diskutuar për propozimin evropian, të cilin kryeministri i Kosovës e vlerëson si bazë të mirë për diskutim të mëtejshëm për të ecur përpara drejt normalizimit të plotë të marrëdhënieve ndërmjet Kosovës dhe Serbisë, me njohje reciproke në qendër.
Së fundmi për takimin e sotëm me një komunikatë ka dalë Zyra e Kryeministrit, në të cilën thuhet se kjo është hera e dytë që kryeministri Kurti priti në takim këshilltarët për politikë të jashtme dhe siguri, Plotner dhe Bonne, pas takimit të parë më 9 shtator 2022, e kësaj radhe atyre iu bashkëngjitën edhe këshilltari diplomatik i Kryeministres së Italisë, Talo dhe emisari amerikan, Escobar.
“Për më shumë se dy orë u diskutua për propozimin evropian, të cilën Kryeministri Kurti e vlerëson si bazë të mirë për diskutim të mëtejshëm për të ecur përpara drejt normalizimit të plotë të marrëdhënieve ndërmjet Kosovës dhe Serbisë, me njohje reciproke në qendër”, thuhet në njoftim.
Më tej thuhet se është diskutuar edhe për të drejtat e pakicave, për çka kryeministri ka shprehur konsideratën edhe në kornizën e përgjithshme për marrëveshje të propozuar nga vetë ai me 18 gusht 2022 në Bruksel.
Kurti, ndër të tjera në takim ka theksuar nevojën e Kosovës për njohjen nga shtetet mosnjohëse dhe anëtarësimin në organizata kyçe ndërkombëtare dhe trans-atlantike.
“Ai i njoftoi emisarët për të arriturat dhe sukseset e Kosovës në vitin që lamë pas në fushën e sundimit të ligjit, për reformat e ndërmarra, progresin demokratik dhe ekonomik, si dhe për aplikimin e Kosovë në Këshillin e Evropës në maj të vitit të kaluar dhe në Bashkimin Evropian në dhjetor, si hapa historik për Kosovën”.
Sipas komunikatë, Kurti i ka falënderuar të gjithë emisarët dhe vendet e tyre për përkushtimin dhe angazhimin në procesin e dialogut dhe rrugën përpara, duke shprehur gatishmërinë e tij për takime të radhës të nivelit të lartë politik dhe intensifikim të procesit.
Vizita e emisarëve ndërkombëtarë në Prishtinë dhe Beograd po bëhet me qëllim të intensifikimit të dialogut ndërmjet Kosovës dhe Serbisë.
