Skënderaj është një nga komunat e goditura më rëndë nga përmbytjet në Kosovë, teksa pamjet e qytetarëve që lëviznin në rrugë me gomone e varka kanë pushtuar rrjetin.
Sakaq në disa fotografi të publikuara sot nga mediat kosovare, shihet se vërshimet e lumenjve në qytet kanë shkaktuar dëme të mëdha në infrastrukturë dhe kanë shkatërruar dhjetëra automjete.
Disa objekte banimi, biznese e toka bujqësore janë prekur nga rrjedha e ujit. Sakaq kryetari i Komunës së Skenderajt ka thënë për Telegrafin se janë evakuuar rreth 120 familje.
“Sot gjendja është më stabile, niveli i ujit ka rënë dukshëm, është i qetë dhe reshjet janë ndal, por dëmet janë shumë shumë të mëdha, si në infrastrukturë, si në ekonomi familjare, biznes. Vlerësohet me miliona dëme që janë të shkaktuara”, ka thënë ai.
Nga reshjet e shiut dëme të mëdha janë shkaktuar edhe në komunat e Mitrovicës, Klinës dhe Istogut, ku shumë familje kanë dalë nga shtëpitë e tyre për ta kaluar natën tek familjarët, pasi objektet e tyre të banimit janë përmbytur.
