Sigla në të cilën Partia Demokratike do të regjistrohet në zgjedhjet lokale të 14 majit, teksa Enkelejd Alibeaj është kapur pas vulës duke mbajtur peng forcën kryesore të opozitës, për nënkryetarin e selisë blu Oerd Bylykbashi duket se është një çështje e zgjidhur.
Bylykbashi ka konfirmuar së fundmi se Partia Demokratike do të regjistrohet në zgjedhje pasi ka një vendim gjykate që njeh statutin e 11 Dhjetorit 2021, duke i dhënë të drejtë që të paraqiten në KQZ.
“Si do të regjistroheni? E dini ju se deri para 1 viti nuk ishte kurrë kjo pyetje, por kur do të regjistroheni. Nuk duhet të ekzistojë ideja që partitë të pengohen për të hyrë në zgjedhje. Zgjedhjet nuk janë histori personash dhe interesash.
Ne kemi një vendim gjykate. Gjykata ka vendosur që Statuti i PD është miratuar në 11 dhjetor 2021. Atë ditë është miratuar logo dhe vula e re, atë që e përdorim që është e themelimit të PD, dhe është shkarkuar Lulzim Basha dhe janë shkarkuar organet e tjera.
Ka një vendim gjykate në fuqi, dhe nuk ka një vendim tjetër që ta ketë rrëzuar.
Ju mund të thoni se nuk ka formë të prerë, atëherë precedenti është vendosur në 2019 me Bindjen Demokratike, që është regjistruar me një vendim që kishte kaluar vetëm 1 ditë. KQZ tha po ne e pranojmë këtë dhe e quajmë të ligjshme. Ai është precedent ligjor i vendosur nga KQZ-ja dhe i pranuar edhe nga Gjykata Kushtetuese.
Pra e kemi precedentin, vendimin e gjykatës, logon, vulën, kemi kryetarin e partisë dhe të gjitha. Vetëm vullneti kundër i Edi Ramës mund ta pengojë, se gjithçka tjetër është procedure”, tha Bylykbashi në SYRI TV.
Deputeti demokrat gjithashtu tha se një nga afatet kryesore para zgjedhjeve lokale të 14 majit është 29 janari kur do të bëhet caktimi i anëtarëve të KZAZ-ve.
“Gjysmën e mazhorancës e ka qeveria dhe gjysmën e ka opozita. Po u thye kjo rikthehemi në konfliktet e mëdha të viteve 2000-2001. Edhe negociatat në rezidencën e ambasadores amerikane, debati ky ishte, që të merrte kontrollin qeveria në të gjitha komisionet. Atë e kundërshtova unë, nuk pranoj që të marrë komisionet 5 me 2 mazhoranca”, deklaroi ai.
