Një aksion i Guardi di Finanzas së Barit ka çuar në zbulimin e 100 kilogramëve kokainë në portin e Savonës.
Ajo çka habiti agjentët ishte fakti se trafikantët e kishin fshehur drogën në pjesën e hekurt që qëndron nën ujë të anijes tregtare dhe u desh ndërhyrja e polumbarëve për ta nxjerrë prej vendit të përshtatur.
Gjithsej u sekuestruan 741 blloqe kokaine, të ambalazhuara në 26 mbështjellës celofani, të fshehura me zgjuarsi në “karinat” e motorëve të varkës, me një peshë totale rreth një ton.
Ndërhyrja është zhvillimi i një operacioni që nisi më 2 janar dhe çoi në arrestimin e katër shqiptarëve dhe sekuestrimin e 3.5 kuintaleve kokainë.
Katër shqiptarët u shokuan kur agjentët ndërhynë për t’i arrestuar teksa jetonin në një strukturë akomodimi në Celle Ligure (Savona).
#GDF #Bari: sequestrata oltre una tonnellata di cocaina trasportata a bordo di una nave mercantile approdata nel porto di Savona.#NoiconVoi pic.twitter.com/MMZSc6hi0g
— Guardia di Finanza (@GDF) January 18, 2023
Pas prangosjes së tyre agjendët e Guardia di Finanza mësuan për mbërritjen në portin e Savonës të një ngarkese tjetër me lëndë narkotike në një anije tregtare, me flamur të Hong Kongut, e cila u nis nga porti i Santos në Brazil më 30 dhjetor.
Kjo është arsyeja pse anija tregtare po monitorohej me mjete ajrore dhe detare, pasi ajo kishte kaluar Gjibraltarin. Dje në mëngjes sapo mbërriti në portin e Savonës ndodhi operacioni blic.
Sipas mediave vendase kemi të bëjmë me një hetim nga Drejtoria e Antimafis së kryeqytetit pulian që synon goditjen përfundimtare të një shoqate kriminale të dedikuar për trafikun transnacional të kokainës, e cila dyshohet se operon në Italinë qendrore dhe jugore në bashkëpunim me grupe të krimit të organizuar shqiptar.
