Amnistia Fiskale dhe disa praktika të caktuara financiare të qeverisë Rama, duket se nuk pranohen gjerësisht në PS dhe këtë e ka shprehur hapur ish-deputeti Ervin Bushati.
Pasi argumentoi se Amnistia do të ishte “oksigjen” për krimin e organizuar dhe do të kanalizonte paratë e pista në ekonomike, ish-kreu i PS për Tiranën ka nxjerr në pah edhe faktin se qeveria e majtë nuk mund të aplikojë TVSH për ushqimet njëjtë me vlerën e taksës për një makinë luksoze.
“Reformë e drejtë në Financa. Inflacioni e lufta kërkojnë ndryshime në fiskun e Shqipërisë. TVSH e ushqimeve s’mund të jetë 20 përqind sa makinat e luksit dhe diamantet. Jemi forcë e majtë dhe do ishte mirë të rriteshin progresiviteti për aktorët e mëdhenj në treg dhe koncesionet”, tha Bushati.
Ai shtoi më tej se duhet të ndërmerren tre reforma me peshë në ekonomi, ndërsa theksoi se zgjidhja për të vënë në lëvizje kapitalin që fle në Shqipëri, nuk është Amnistia Fiskale, të cilën e kërkon medoemos kryeministri Rama.
Diskutimi për Amnistinë Fiskale ka vite që është bërë pjesë e leksikut politik. Mendoj që Amnistia vjen kur të gjitha palët janë dakord, FMN, BB, BE, SHBA dhe partnerët duhet të jenë dakord. Edhe opozita duhet të ishte dakord për mos politizimin e çështjes. Ekonomia shqiptare ka bërë shumë përparime.
“Duhen ndërmarrë 3 reforma të mëdha. Ka ardhur koha të kthehemi në reforma të mëdha që u lanë. U nis me Reformën në Drejtësi. Rama ka dremitur pak duke parë opozitën në Netflix. Reformë për kapitalin. Nuk është Amnistia zgjidhje për të vënë në lëvizje kapitalin që fle në Shqipëri. Bursa e Tiranës ekziston në letër por nuk funksionon. Administratë e shtet i drejtë. Vettingu funksionoi në drejtësi, le ta bëjmë edhe me zyrtarët e lartë dhe politikanët”, deklaroi ai.
