Deputetët demokratë Jordia Tabaku dhe Dashamir Shehi propozuan këtë të Mërkurë në komisionin parlamentar të ekonomisë bllokimin e kontratave koncesionare që skadojnë (mosrinovimin) si dhe mos nënshkrimin e të rejave deri në fund të vitit.
Ata thanë se duhet të ketë një pauzë deri në këtë periudhë, kur pritet një ligj i ri për koncesionet, në kuadër të afrimit të përafrimit të legjislacionit me BE pas çeljes së negociatave për anëtarësimin e Shqipërisë në Bashkimin Europian.
“Koncesionet do vazhdojnë të jepen se ka një tufë që kërkojnë dhe ne do jemi këtu vitin tjetër, do numërojmë paret. Koncesionet shkelen dhe janë shkelur dhe nga qeveria e mëparshme. Ndaj them; e bllokojmë sot dhe e bëjmë si gjithë Europa”, tha Shehi.
Ideja u mbështet dhe nga deputeti i mazhorancës Erion Braçe. “Për mua problem është koha. S’mund të jepen kontrata tani ndërkohë që në fund të vitit do ndryshojmë rregullat. Pse unë të privilegjohem tani ndërkohë që në fund të vitit dikush tjetër do konkurrojë me rregulla të tjera. Propozimet e zonjës Tabaku, qëndrojnë”, u shpreh ai.
Megjithatë, e gjitha mbeti në kuadrin e diskutimit.
Gjatë seancës së sotme, deputetja Tabaku propozoi 4 ndryshime ligjore për kontrollin e kontratave për koncesionet dhe PPP-të në Komisionin e Ekonomisë.
Në seancë nuk pati votim për çështjen, por vetëm diskutime.
