Kolegjit i Posaçëm të Apelimit ka lënë në fuqi vendimin e shkarkimit nga detyra e gjyqtarit për Andi Civicin.
Vendimi u mor këtë të Martë nga trupa gjykuese e përbërë nga Natasha Mulaj kryesuese, Rezarta Schuetz relatore, dhe antarët Albana Shtylla, Ina Rama e Sokol Çomo.
Më 4 mars 2020, Komisioni i Pavarur i Kualifikimit vendosi shkarkimin nga detyra për gjyqtarin e Apelit të Tiranës, Andi Civici–i cili iu nënshtrua procesit të vetingut vetëm për kriterin e pasurisë. Sipas vendimit të arsyetuar të KPK-së, Civici nuk arriti të justifikojë pasurinë e tij të patundshme, të ngritur kryesisht përmes huave dhe transaksioneve financiare me familjarët.
Andi Civici e ka filluar karrierën në sistemin gjyqësor në vitin 2003 si gjyqtar në Gjykatën e Fierit. Në vitin 2010, Civici u emërua gjyqtar i Apelit të Vlorës. Funksion të cilin e mbajti deri në vitin 2016, kur u transferua në Gjykatën e Apelit Tiranë, deri në shkarkimin nga vetingu.
