Numri i banesave me dëmtime nga tërmeti i mbrëmjes së djeshme është rritur, krahasuar me raportimet paraprake të një dite më parë.
Shtabi i Emergjencave u mblodh në Klos mëngjesin e Hënës. Gjatë mbledhjes, u bë e ditur se ka pasur ankesa për dëmtime në 22 banesa: 8 në njësinë Xibër, 2 në njësinë Gur dhe 12 në Klos.
“Dëmtimet e tyre kanë qenë të lehta. Janë të njëjta që kanë pësuar edhe në tërmetet e tjera”, saktësoi në një prononcim për mediat Kreu i bashkisë Klos, Ilmi Hoxha, duke shtuar se kanë nisur verifikimet në terren.
Dëmet në disa banesa
Po ashtu, kryetari i Bashkisë së Tiranës konfirmoi se “katër banesa janë dëmtuar në fshatrat e largëta të njësisë Zall Bastar”.
Dëmet janë shënuar kryesisht në banesa të vjetra. Po ashtu, një pallat në Bulqizë që ka pasur dëme që nga tërmeti i Nëntorit 2019, sipas banorëve, është dëmtuar edhe më shumë.
Një më parë, Emergjencat Civile raportuan pak pas tërmetit se “ka njoftime për dëmtime në 3 shtëpi të banueshme në Njësinë Administrative Xibër”. Deri në publikimin e këtij artikulli, nuk ka pasur një përditësim nga ky institucion.
Sipas IGJEUM, tërmeti ishte me magnitudë 4.7 dhe thellësi 8.8 km. Lëkundja u shënua në orën 22:37 të së Dielës dhe epiqendra llogaritet në Xibër të Dibrës.
Tërmeti u ndje fuqishëm në zonat përreth epiqendrës, si edhe në kryeqytet, ku shumë qytetarë lanë banesat dhe dolën në rrugë pas lëkundjeve.
Në Klos dhe Bulqizë, banorë kanë treguar për mediat se e kaluan natën jashtë banesave për shkak të frikës.
Sipas sizmologëve, goditja me magnitudqë 4.7 ishte ngjarja kryesore, ndërsa janë shënuar edhe disa pasgoditje.
Sizmiologët janë shprehur se nuk ka vend për panik dhe se pasgoditjet janë një aktivitet normal.
