Një pikë tregtimi gazi është bllokuar në Babrru nga policia, që ka arrestuar një 21-vjeçar. Biznesi në fjalë, sipas bluve, shiste gaz kontrabandë dhe funksiononte “në të zezë”.
Në pranga u vu F.M., 21 vjeç, banues në Babrru. Nga veprimet hetimore, ka rezultuar i riu., në lagjen “Skënderbeu”, në Babrru, kishte përshtatur një ambient në të cilin tregtonte gaz të kontrabanduar dhe këtë aktivitet nuk e kishte deklaruar në organet kompetente.
Gjatë kontrollit në këtë ambient u konstatua një pompë karburanti dhe një depozitë metalike, e mbushur me 1500 litra gaz, që dyshohet se është i kontrabanduar, si dhe 28 bombola gazi, të cilat u sekuestruan në cilësinë e provës materiale.
Aksioni i koduar “Metalic”, sipas policisë, “u krye nga specialistët e Seksionit për Hetimin e Krimeve Ekonomike dhe Financiare në DVP Tiranë, bazuar në informacionet e siguruara nga inteligjenca informative”.
