Deputetja e Partisë Demokratike, Sorina Koti ka folur në lidhje me situatën e brendshme dhe përplasjet e fundit brenda kësaj force politike.
Në një intervistë për Euronews Albania, Koti u shpreh se nisma për ta bërë Ervin Salianjin kryetar të Grupit Parlamentar kishte nisur më parë, ndaj dhe Enkelejd Alibeaj mori vendimin për përjashtimin e katër deputetëve.
Ajo shtoi se Salianjit i nevojiten 17 vota për t’u bërë kryetar grupi, por u shpreh se përjashtimi i katër deputetëve nga Alibeaj, e komplikon situatën.
“Reagimi i zotit Alibeaj ishte surprizë për ne, sepse nisma për të bërë zotin Salianji kryetar të grupit kishte nisur më herët. Ndoshta kjo e ka vënë në lëvizjen zotin Alibeaj për të përjashtuar katër deputetë të tjerë. Në këto kushte, situata është pak e komplikuar sepse zoti Salianji ende nuk i ka bërë votat e duhura për t’u bërë kryetar i grupit. Në dijeninë time, duhet të jenë 17 vota. Duke pasur parasysh që katër kolegët nuk janë tashmë pjesë e Grupit Parlamentar, nuk kanë të drejtë për të firmosur për shkarkimin e zoti Alibeaj. Kemi edhe një pjesë të kolegëve të tjerë të cilët bëjnë pjesë në grupe të tjera parlamentare. Nuk jemi të gjithë deputetët e PD-së në Grupin Parlamentar, jemi pak të shpërndarë”, theksoi ajo.
Sorina Koti është një nga 20 deputetët e Partisë Demokratike që kanë firmosur për shkarkimin e Enkelejd Alibeajt.
Ajo thotë se Ervin Salianji po lobon me deputetët demokratë për bashkimin e Grupit Parlamentar të kësaj force politike. Koti u shpreh se Salianji është aktualisht nën kryetar i grupit dhe mund të gjejë një zgjidhje.
“Zoti Salianji është duke lobuar me deputetët për t’iu ofruar komprimisin e bashkimit të Grupit Parlamentar të Partisë Demokratike, për të hequr këtë ngërç që na ka kapur në këto momente. Ndoshta është një zgjidhje, sepse e ka pozicionin e nën kryetarit. Ne kemi pasur Kryesinë e Grupit Parlamentar, që ka gati një vit që nuk funksionon më. Ne nuk thirreshim më nga kryetari i grupit për të diskutuar për çështjet tona të brendshme”, theksoi ajo.
