Festa në klube nate të shtrenjta me shampanjë, foto nga “Kulla Eifel” në Paris dhe xhiro me automjete luksoze, është pamja vanitoze që të ofrojnë rrjetet sociale të Ivana Plantovska, çka të bëjnë të mendosh se në Ukrainë, vendi nga ajo vjen, nuk ka kurrsesi luftë.
Por, ironia e fatit është se Plantovska është zëdhënësja ende në detyrë e zyrës rajonale jugore të Shërbimit Shtetëror të Kufirit të Ukrainës dhe pushimet e saj luksoze në Paris kanë “tërbuar” bashkëkombësit e saj.
Një zemërim shpërtheu në rrjetet sociale, pasi gazetari vendas Kostyadin Andriychuk ndau në Facebook foto të sajat, me qindra ukrainas që i konsideruan postimet e mrekullueshme të Ivanës shumë të papërshtatshme gjatë kohës së luftës.
“Çështja këtu nuk është nëse të ardhurat e saj përputhen me këtë mënyrë jetese luksoze. Çështja është se publikimi i fotove të tilla në kohën e luftës nga një person në këtë postim është një sëmundje e pashërueshme. Ajo ka postuar një foto nga Parisi dhe resortet e tjera ku ka festuar Vitin e Ri. Bota u zemërua sepse në vend po shpalosen konflikte ushtarake në shkallë të gjerë”, shkruan gazetari ukrainas.
Sipas gazetës ukrainase “Pravda”, kjo sjellje nuk është diçka e re për përfaqësuesen e shtypit, e cila ka një dobësi të veçantë për rrjetet sociale dhe nuk heziton të ndajë foto nga jeta e saj luksoze në Instagram dhe Facebook.
Në muajt e mëparshëm, ndërsa vendi i saj ishte në luftë, Plantovska postoi foto nga pushimet e saj në një resort dhe mori pjesë në një set fotografik të diskutueshëm me një “Mercedes Benz” luksoz me emrin “IVANKA” të shkruar në targën e tij.
Shumë nga bashkatdhetarët e Plantovskës e kritikuan atë me postimet e tyre në rrjetet sociale. Avokati Maksim Zuravliov theksoi se kjo nuk mund të jetë kurrsesi zyrtare e një vendi në luftë.
Një përfaqësues i Shërbimit Shtetëror të Rojës Kufitare të Ukrainës tha për “Pravda” se administrata ishte në dijeni të situatës dhe po merrte masat e duhura.
“Nuk kam të drejtë të komentoj jetën personale të drejtuesve të shërbimit, ka të bëjë vetëm me ta. Megjithatë, mund të them se për zhvillimet e ditëve të fundit në lidhje me drejtuesen tonë nga Odessa , shërbimi ka reaguar menjëherë. Vendimet e marra kanë të bëjnë me të ardhmen e mandatit të saj dhe kryerjen e detyrave të saj. Gjithçka do të bëhet në kuadrin e përcaktuar nga legjislacioni”, theksoi ai.
Në një koment të veçantë pa mikrofon, ai tha se është për të ardhur keq që në kohë lufte, dhe kur shumica e pjesëtarëve të shërbimit po mbrojnë vendin e tyre në front duke rrezikuar jetën, ka disa që, jo vetëm i japin përparësi jetës së tyre personale, por tashmë janë duke e shfaqur atë në rrjetet sociale për karshillëk.
