Në KQZ u hodh sot shorti për anëtarin e shtatë të KZAZ-ve, ku u vendos që në të gjitha KZAZ me numër çift, anëtar kryesuesi do të vijë nga radhët e PS, ndërsa në ato KZAZ (qendra votimi) me numër tek, kryesuesi do të jetë i PD.
Por në konferencën për mediat pas hedhjes së shortit kreu i KQZ, Ilirjan Celibashi nuk mund t’i shpëtojë sërish pyetjes së gazetarëve lidhur me regjistrimin e Partisë Demokratike në zgjedhjet e 14 majit.
I pyetur nëse do të regjistrojë partinë e Berishës apo Alibeajt, kreu i KQZ tha se në momentin që përfaqësuesit do të dorëzojnë dokumentet, do vlerësohet legjitimiteti i përfaqësimit zyrtar të PD me një dokument që nuk e prodhon KQZ, por gjykata e Tiranës.
“Jo vetëm në dijeninë time por logjikisht ka një PD që ka edhe emrin. Nuk mund të ketë dy parti me të njëjtin emër. I presim propozimet për anëtarët të KZAZ nga PD. Do vlerësojmë legjitimitetin e atij që do i paraqesë këto propozime. Do duhet të ketë autorizimin nga partia politike. Vlerësimi nëse autorizimi ekziston dhe nëse është lëshuar nga drejtuesi i Partisë Demokratike”, tha ai.
Më tej, Celibashi shtoi se KQZ ka ruajtur komunikim institucional me Partinë Demokratike.
“Përfaqësues të PD në KQZ është zoti Marash Logu dhe Indrit Sefa. Në kuadër të komunikimeve qoftë edhe të karakterit profesional kemi komunikime me Ivi Kason dhe përfaqësues të tjerë. Do ta them edhe njëherë që shpresoj të jetë e qartë. Do vlerësojmë legjitimitetin e atij që përcjell dokumentacionin në KQZ nëse ka apo jo tagrin për të sjellë në emër të PD kërkesa të ndryshme. Sot është përfaqësues i PD Logu dhe Sefa. Do jenë këta nesër apo pasnesër nuk e them dot por autorizimi që ata kanë është në përputhje me parashikimet e kodit zgjedhor.
Kur të vijë një kërkesë edhe për regjistrimin e Partisë Demokratike do vlerësojmë legjitimitetin e atij që sjell dokumentin. Për nevojën për të qartësuar duhet të kuptojmë që kjo është një çështje që nuk e vendos KQZ se kush është organi që përfaqëson një parti politike. Është një institucion tjetër. Do vlerësojmë kur të kemi këto kërkesa bazuar në një dokumentacion që nuk e prodhon KQZ”, nënvizoi Celibashi.
