Nga Boldnews.al
Ka një fakt interesant në tenderat që zhvillon bashkia e Skraparit.
Thuajse të gjithë tenderat e fituar nga kompania “Desaret Company” janë të shoqëruar me “flamuj të kuq”, të cilët ngrihen sa herë që mbi procedurat ka dyshime.
“Boldnews.al” kreu verifikime mbi këto tendera dhe rezultoi që kompania ndërtuese ka fituar tenderat e Skraparit ose si ofertues i vetëm ose pasi më parë janë eleminuar konkurentët e tjerë.
“Desaret Company” ka fituar tender me “flamur të kuq” edhe jashtë bashkisë Skrapar.
Kompania është në pronësi të Vladimir Metanit, një biznesmen i lidhur fort me opozitën.
“Flamujt e kuq” të “Desaret Company”
Në shtator të vitit 2022, kompania “Desaret” shpallet fituese e tenderit të zhvilluar nga Bashkia Skrapar, me objekt “Mur mbrojtës përgjatë lumit Osum te ish-kantieri N.SH.N”, me fond limit rreth 52 milionë lekë të reja.
Në garë marrin pjesë katër operatorë ekonomikë. Bashkia skualifikon tre konkurentët dhe në fund shpallet fitues kompania e vetme e mbetur në garë, “Desaret” e Vladimir Metanit me ofertën 50.6 milionë lekë të reja, e cila nuk ishte më e ulta.
Në mars të vitit 2021, shoqëria “Desaret” fiton pa garë dhe pa rivalë tenderin e zhvilluar nga Bashkia Skrapar për “Furnizimi me ujë i fshatrave Gjerbës dhe Kakrukë, Bashkia Skrapar”, me fond limit 100 milionë lekë të reja.
Në gusht të vitit 2020, ‘Desaret Company” fiton një tjetër tender të zhvilluar nga Bashkia Skrapar, me objekt “Mbrojtje nga lumi Guhak në krahun e majtë në zonën e quajtur Verori, Çorovodë”, me fond limit 18.5 milionë lekë të reja. Në dokumentat e tenderit rezulton se shoqëria e Vladimir Metanit ka dhënë ofertën më të lartë, por është shpallur fituese pas skualifikimit të konkurentit tjetër.
Edhe më herët, në korrik të vitit 2017, “Desaret Company” ka fituar pa garë tenderin me objekt “Rikonstruksion i Shkollës 9 -Vjeçare “Kahreman Ylli”, Çorovodë”, me fond limit rreth 53 milionë lekë të reja.
“Flamuj të kuq” ngrihen edhe në tendera të tjerë, të fituar nga “Desaret Company”, në bashki të tjera.
Kështu, në janar të vitit 2021, kompania në pronësi të Vladimir Metanit, ishte pjesë e fituesve në tenderin e zhvilluar nga Bashkia Rrogozhinë, me objekt “Rikonstruksion i magjistralit kryesor dhe rrjetit të ujësjellësit të fshatrave, Lekaj, Harizaj, Kryeluzaj, Zambisht, Okshtun dhe Mushnik, Nj.A, Lekaj, Bashkia Rrogozhinë”.
Fondi për këtë tender ishte rreth 250 milionë lekë të reja dhe në garë merr pjesë vetëm një bashkim operatorësh, ku ishte pjesë edhe “Desaret Company”.
Tenderat e Rindërtimit
Ndërkohë, të dhënat zyrtare dëshmojnë se “Desaret Company” është pjesë e kompanive fituese nga fondet e Rindërtimit, nëpërmjet tenderave me procedurë të kufizuar.
“Desaret Company” është pjesë e një bashkimi operatorësh ekonomikë, të cilët, në 30 Prill të vitit 2021, u shpallën fitues në tenderin me objekt “Rikonstruksioni i mjediseve në bashkëpronësi ose të përbashkëta në ndërtesat pallat, të prekura nga Tërmeti i datës 26.11.2019, në Territorin e Bashkisë Lezhë (Loti II)”, me ofertë 92.5 milionë lekë të reja.
Në Tetor të vitit 2022, “Desaret Company” ishte pjesë e një bashkimi operatorësh që fituan tenderin me objekt “Riforcimi i njësive individuale të banimit dhe njësive të banimit në ndërtesa (pallat), të cilat janë klasifikuar me shkallë dëmtueshmërie DS4, qyteti Kavajë”, me ofertën rreth 530 milionë lekë të reja.
Ndërkohë, kompania në pronësi të Vladimir Metanit është shpallur fituese edhe në shumë tendera të tjerë, të zhvilluar nga institucionet qendrore e locale.
Sipas portalit “spending.data”, të specializuar për transaksionet e Thesarit të Shtetit, rezulton se “Desaret Company” ka përfituar më shumë se 600 milionë lekë të reja publike vetëm gjatë periudhën 2019-2022.
