Deputet i Partisë Demokratike dhe njëkohësisht dhe kandidat për kryetar bashkie i Tiranës, Belind Këlliçi, u shpreh për A2 CNN se Enkelejd Alibeaj nuk do të jetë më kreu i grupit parlamentar demokrat.
“Unë dhe Salianji nuk kemi qenë miqtë më të mirë me njëri-tjetrin, por kemi vazhduar rrugën tonë në PD dhe për hir të bashkimit të demokratëve, kam votuar për zotin Salianji si kreun e ri të grupit parlamentar. Unë betejën politike e kam vetëm me Edi Ramën dhe Erjon Veliajn, jo me Enkelejd Alibeajn. Jam i sigurt se Alibeaj nuk do të jetë më kreu i grupit parlamentar demokrat”, deklaroi Këlliçi.
Këlliçi shtoi se beson se Alibeajn do ta zëvendësojë Salianji, por e rëndësishme është që deputetët të zgjedhin kë të duan.
“Kushdo që bën 50%+1 të votave, le të bëhet. 27 deputetëve i takon që ta zgjedhin”, shtoi ai.
