Nga Klodian Tomorri
Në 6 muajt e fundit kompania që ka parkimin e automjeteve në Aeroportin e Rinasit ka ndërruar dy herë duar. Herën e parë u shit në qershor të vitit të kaluar për 500 mijë euro. Bleresi ishte një kompani e quajtur International Technologies Holding, pa asnjë historik, pa asnjë rekord financiar.
Herën e dytë u shit para disa ditësh. Çmimi i shitjes 505 mijë euro. Blerësi është një kompani e quajtur Albcart, që kishte nja 4 vjet me status të pezulluar. Fitim kapital, hiç. Tatim për shtetin hiç. Në gjithë këto manovrat u fut një herë në mes edhe Autoriteti i Konkurrencës. Nejse.
Kompania që ka parkimin e aeroportit të Rinasit, vitin e kaluar regjistroi një fitim neto, pas taksave, 585 mijë euro. Dhe shitet vetëm 505 mijë euro. Pra çmim shitje 0.8 vite fitim neto.
Normalisht një çmim i këtij lloji mund të justifikohet vetëm në rastet kur kompania është e borxhuar rëndshëm. Por kjo e ka kapitalin 4 herë mbi detyrimet. Investim që t’i kthen paratë për 10 muaj. Kokë më kokë me Gjallicën.
Ky muhabet është me shumicën e kompanive që blihen dhe shiten në Shqipëri. Magjistarë tregu. Ose proces lavatriçe. Dhe tatimet rrinë e vështrojnë.
