Rreth një orë pasi hyri në ambientet e Prokurorisë së Posaçme për t’u njohur me akuzat që rëndojnë mbi të pas përfundimit të hetimeve për çështjen “Gërdeci”, ish-ministri i Mbrojtjes Fatmir Mediu ka lënë ambientet e godinës në rrugën “Jordan Misja” për të pasur edhe një komunikim me gazetarët.
Teksa SPAK e ka marrë zyrtarisht të pandehur për tragjedinë e Gërdecit, Mediu tha për gazetarët se i është prezantuar e njëjta aktakuzë si në vitin 2009, të cilën ai e cilëson si të motivuar politikisht.
“Dua të bëj me dije që më është prezantuar e njëjta akuzë më të njëjtët prokurorë. Mu komunikua shpërdorim detyre, por po ua them që kam kërkuar që në fillim të them dhe asnjëherë nuk jam pyetur. Motivimi politik është në akuzën që është bërë. Nuk është urdhëri i ministrit që ka shkaktuar problemin. Nëse ministri nuk këshillohet me VKM-në dhe drejtuesit ushtarakë, nuk është ministër”, tha Mediu.
Sa i përket qëndrimit të tij, ish-ministri i Mbrojtjes ripërsëriti se është i pafajshëm.
“Ajo që mu paraqit është fashikulli i firmosur nga prokurorët e Prokurorisë së Përgjithshme. Çështja e demontimit të armëve është çështje e sigurisë kombëtare. Unë jam i pafajshëm. Unë thash që jo vetëm që nuk e pranoj akuzën, por të paktën duhet të jem një person që të pyetem për veprimet e mia. Nëse ka ndonjë kontakt timin ose familjen time me biznesmenët që kishin marrë në dorëzim demontimin e armëve, unë marr çdo përgjegjësi”, shtoi Mediu.
Sakaq SPAK e akuzon Mediun për “shpërdorim detyre” dhe “shpërdorim detyre në kuadrin ushtarak” në lidhje me tragjedinë e Gërdecit ku nga shpërthimi i punishtes së demontimit të armëve mbetën të vrarë 26 persona dhe të plagosur qindra të tjerë. Ndërkohë, brenda 10 ditëve dosja do të shkojë në GJKKO që të shqyrtohet.
