Ndërprerjet e shtatzënisë ashtu si dhe lindjet kanë ardhur në ulje nga vitit në vit. Sipas të dhënave të ISHP-së mesatarisht në një vit kryhen rreth 5 mijë aborte.
Raporti lindje/abort ka arritur në 6.2:1, që nënkupton se në vendin tonë afërsisht në 6 lindje kryhet 1 abort. Në krahasim me 2016 që ishte 5.9:1 ky raport është rritur për shkak të uljes më të ndjeshme të lindjeve, nga 31 mijë në 28 mijë lindje.
Rreth 2.9 % e aborteve në total, kryhen në moshën 14-19 vjeç, nga 5.1% që ishte në 2016. Sipas të dhënave të ISHP-së nga 220 aborte tek adoleshentet në 2016, në 2020 janë regjistruar 105 aborte tek të miturat.
Shumica e aborteve në vendin tonë kryhen në moshë të re, rreth 66% e tyre kryhen nga gra të moshës 20-34 vjeç. Sipas analizës së skedave të aborteve, vihet re një rritje e ndërprerjeve të shtatzënisë nga gratë beqare pasi nga 5.7% që ishte në 2026, u rrit në 8.3% në 2020, por dominojnë gratë e martuara me rreth 91%.
Trendi i aborteve të kryera në vite, nxjerr në pah se gjithnjë e më tepër abortet kryhen kryesisht nga femrat të cilat nuk janë të punësuara dhe të siguruara. Për vitin 2020 abortet e kryera nga femrat e papuna zënë rreth 65 % të aborteve. Ndër qarqet me nivel më të lartë të abortit është Vlora (283 aborte për 1000 lindje), Fieri (194.8) dhe Beratin (194.7)
e më pas Tiranën (186 aborte për 1000 lindje).
Abortet në 5 vitet e fundit
Viti 2016 5410 aborte
Viti 2017 5279 aborte
Viti 2018 5532 aborte
Viti 2019 5183 aborte
Viti 2020 4540 aborte
Raporti lindje/abort
Viti 2016 5.9:1
Viti 2020 6.2:1
Aborti ne adoleshence (14-19 vjeç)
Viti 2016 220 aborte
Viti 2020 105 aborte
Abortet sipas moshës
Mosha minimale 14 vjeç
Mosha mesatare 30.9 vjeç
Mosha maksimale 57 vjeç
66% e aborteve ne moshën 20-34 vjeç
/Klan News/
