Detaje të reja kanë dalë në dritë nga sekuestrimi i shumës së bujshme prej 500 mijë euro që iu bë Rozeta Dobit dhe Havier Dobit, të cilët i kishin grabitur paratë në banesën e ish-shefes së kabinetit në Ministrinë e Financave, Alda Klosi.
Zyrtarja që ka punuar nën urdhërat e Arben Ahmetajt dhe aktualisht rezulton e punësuar në Kryeministri pranë Edi Ramës si këshilltare e institucionit ka pasur të fshehur në një kasafortë pjesën më të madhe të parave.
Sipas OraNews këtë e ka zbuluar grabitësja, Rozeta Dobi e cila ka pranuar të tregojë se vjedhjen e banesës së Alda Klosit, e ka kryer së bashku me djalin e saj, Havier Dobin, i cili e ka ndihmuar për të lëvizur kasafortën që zyrtarja e Kryeministrisë mbante në shtëpi.
Rakipllari ka pasur dijeni se brenda në kasafortë kishte një shumë të madhe eurosh, pasi sipas saj, e kishte parë disa herë pronaren e shtëpisë të hapte kasafortën në prezencë të saj.
Në momentin që Klosi e ka njoftuar se do largohej nga banesa për disa ditë dhe i ka lënë një kopje të çelësit të shtëpisë, Rozeta Rakipllari së bashku me djalin e saj Havier Dobi, kanë vënë në zbatim planin për të bërë vjedhjen e kasafortës.
Pastruesja ka hapur derën me çelës dhe së bashku me të birin kanë nxjerr kasafortën. Për ta bërë të besueshme, vjedhjen ata kanë bërë rrëmujë shtëpinë, duke u larguar më pas.
Kasafortën e kanë hapur në shtëpinë e tyre, duke nxjerr dhe shumën financiare dhe fshehur në ambientet e shtëpisë. Por pas hetimeve të kryera, oficerët e komisariatit nr.2 në Tiranë, zbuluan se autorë të dyshuar të vjedhjes së mbi gjysmë milion eurove, janë Rozeta Rakipllari dhe djali i saj, Havier Dobi.
Policia ushtroi një kontroll në shtëpinë e tyre, ku ditën e parë gjeti shumën prej 120 mijë euro. Kjo shumë financiare është pranuar nga pastruesja se ishte vjedhur në banesën e zyrtares së ministrisë, Alda Klosi.
Por nënë e bir gjithashtu janë përgjuar brenda në dhomën e shoqërimit të komisariatit, ku janë vendosur me qëllim së bashku nga hetuesit. Ata kanë diskutuar sesi policia kishte gjetur vetëm 120 mijë euro, por jo shumën tjetër të fshehur prej tyre në tubin e aspiratorit.
Kjo bisedë ka shërbyer si indicie e fortë për policinë se brenda në banesë kishte dhe para të tjera të fshehura, ndaj mesditën e sotme u ushtrua sërish kontroll në shtëpinë e pastrueses, flaë të cilit u gjet edhe shuma prej 404 mijë euro dhe vlera të tjera monetare.
