Detaje të reja janë mësuar nga mbledhja e një dite më parë që kryeministri Edi Rama pati me drejtuesit politikë të Partisë socialiste, ku ndër të tjera janë zbuluar edhe sondazhet për çdo bashki, të cilat pritet të vendosin shumë edhe mbi kandidatët me të cilët mazhoranca do të garojë në zgjedhjet lokale të 14 majit.
Burime nga mbledhje kanë bërë të ditur se të gjithë kryebashkiakët që fituan me 6 mars (Vora, Rrogozhina, Lushnja, Dibra dhe Durrësit) do të rinkofirmohen si kandidatë të PS për zgjedhjet e 14 majit.
Në qarkun e Lezhës, të pasigurt e kanë rikandidimin kryetarja e bashkisë së Kurbinit dhe Mirditës për shkak të rezultateve të dobëta në sondazhe. Për Bashkinë e Vlorës, Rama ka përjashtuar nga kandidimi deputetët socialistë.
Ndërkohë, burimet bëjnë të ditur se projeksioni i socialistëve, sipas sondazheve të tyre, i bën ata fitues në rreth 45 bashki. Gjithashtu, në raportimin e drejtuesve politikë është kërkuar nga Rama edhe një shpjegim i detajuar mbi “censusin” e votuesve socialistë për çdo bashki, ku ndodhen votuesit e tyre të mundshëm, brenda apo jashtë vendit.
Më herët, kryetari i grupit parlamentar të PS, Taulant Balla, është shprehur se PS do të garojë për të fituar në të gjitha bashkitë. Madje, ai tha se këtë herë socialistët kanë shanse të fitojnë edhe në Shkodër. Në anën tjetër, sekretari i Përgjithshëm i PS, Damian Gjiknuri, është shprehur se socialistët nuk do të zbresin nën 40 bashki më 14 maj.
“Partia Socialiste nuk zbret nën 40 bashki. Këto janë llogaritë elektorale në Shqipëri. Për aq kohë sa nuk ka alternativë të besueshme në krahun tjetër”, shprehej Gjinkuri më 23 dhjetor.
/A2 CNN/
