Një makinë “Range Rover” që mbante në kroskot një stemë policie u denoncua nga një qytetar, pasi nuk ishte gjobitur edhe pse kishte parkuar gabim. Makinat e tjerë që ishin pranë saj ishin ndëshkuar.
Videoja u bë publike nga “JOQ”, ndërsa menjëherë reagoi policia, e cila sqaron se pas konstatimit ka aplikuar gjobën prej 2000 lekë të reja për këta automjet.
“Në lidhje me një video të publikuar në rrjete sociale, në të cilën shfaqen disa automjete të ndëshkuara me masë administrative, ndërsa një automjet që në kroskot kishte të vendosur një stemë Policie, nuk ishte ndëshkuar me masë administrative, ju sqarojmë se: Policia Rrugore e Tiranës, më datë 05.01.2023, në orën 17:17, gjatë monitormit të qarkullimit rrugor, ka konstatuar automjetin tip “Range Rover”, që mbi kroskot kishte të vendosur një stemë të Policisë, dhe ndodhej i parkuar në shkelje të sinjalistikës rrugore. Shërbimet e Policisë Rrugore të Tiranës, kanë ndëshkuar në mungesë, me masë administrative 2000 lekë të rinj, drejtuesin e automjetit që kishte parkuar automjetin në kundërshtim me sinjalistikën rrugore, në vendin ku është shfaqur në videon e publikuar në rrjete sociale, së bashku me disa automjete të tjera”, thuhet në reagimin e policisë.
