Vias Cengu, 31-vjeçari nga Kukësi i cili u vra dy ditë më parë në Prizren pas një sherri në lokal nate, është përcjellë për në banesën e fundit.
Një i afërm i tij ka shkruar se i kanë dhënë lamtumirën e fundit të riut dhe ka ndarë një pjesë të fjalës së babait të viktimës.
“Kjo vrasje është përjetuar rëndë jo vetëm nga familjarët por edhe nga të gjithë kuksianët dhe miqtë e shumtë të familjes Cengu nga Kosova e mërgata.”
“Ne kishim një armik të përbashkët, Serbinë, të cilës bashkërisht ia drejtuam pushkën dhe kurrë nuk besoja se kemi plumba për shqiptarë”- u shpreh i ati i Visartit i cili bashkë me vëllezërit e tij i kishte kontribuar luftës së UÇK-së për çlirimin e Kosovës!
“I lehtë i qoftë dheu Visartit e familjarëve Zoti iu dhëntë forcë për ta përballuar këtë dhimbje. Qoftë kjo vrasja e fundit në mes të shqiptarëve!”, ka shkruar mes të tjerash i afërmi.
Cengu dyshohet se u vra nga Dibran Hoxhaj, i njohur me nofkën “Kobra”, i cili është pronar i lokalit ku ai po argëtohej bashkë me dy miqtë e tij. I riu ishte kthyer nga Franca për të festuar ndërrimin e viteve në vendlindje.
