Presidenti i Turqisë, Recep Tayyip Erdogan, i kërkoi homologut rus, Vladimir Putin, që të shpallë armëpushim “të njëanshëm” në Ukrainë.
“Presidenti Erdogan tha se thirrjet për paqe dhe negociata duhet të mbështeten nga një armëpushim i njëanshëm dhe një vizion për zgjidhje të drejt”, tha zyra e Erdoganit, teksa njoftuan më 5 dhjetor se dy liderët kanë zhvilluar një bisedë telefonike.
Erdogan po ashtu pritet të zhvillojë një bisedë telefonike gjatë të enjtes edhe me presidentin ukrainas, Volodymyr Zelensky.
Lideri turk ka përdorur raportet e mira që ka edhe me Moskën dhe me Kievin, për të tentuar që të ndërmjetësojë përfundimin e luftës, që Rusia nisi më 24 shkurt 2022.
Turqia ka ndihmuar në arritjen e një marrëveshjeje, të mbështetur nga Kombet e Bashkuara, për rinisjen e eksporteve të drithërave ukrainase nga Deti i Zi. Erdogan po ashtu vazhdimisht ka tentuar që të sjellë në Turqi Putinin dhe Zelenskyn në një samit të paqes.
Erdogani ka arritur të mbajë raporte të mira me Putinin, pasi ka refuzuar që t’i bashkohet sanksioneve perëndimore ndaj Rusisë. Të dy liderët tani po tentojnë të çojnë përpara planet për të ndërtuar një qendër të gazit natyror në Turqi, që do t’i mundësonte Rusisë një rrugë alternative për të furnizuar Evropën me karburante.
