Kryeministri Edi Rama ka zbuluar detaje nga atë të cilën e quajti “Pako e Madhe” e ndihmës sociale.
Në prag të zgjedhjeve lokale, Rama ka menduar që të hapë “thesin” e qeverisë dhe të shpërblejë të moshuarit me një bonus me vlerë 80 mijë lekë të vjetra.
“MIRËMËNGJES dhe me kënaqësinë e faktit se 695 mijë pensionistë do të marrin nga 8000Lekë (të reja) secili nga Pakoja e Madhe, ku do të kenë pjesën e tyre 1 milionë shqiptarë, që do të përfitojnë sipas kategorive deri në 20000Lekë (të reja), për të zbutur impaktin e inflacionit të luftës deri në fund të këtij dimri të vështirë për mbarë Europën, ju uroj një ditë të mbarë”, shkruan Rama në statusin e tij.
- Paketa e ndihmës vjen në prag të zgjedhjeve lokale:
Në një kohë që Presidenti ka dekretuar 14 majin e vitit 2023 si datë për mbajtjen e zgjedhjeve të ardhshme vendore, qeveria që në ditët e para të janarit do të nisë shpërndarjen e miliarda lekëve për disa kategori.
Përmes rrjeteve sociale ditën e djeshme, kryeministri Edi Rama bën me dije se qeveria që ai drejton është gati të shpërndajë 8 miliardë lekë, ku sqaron se këto para do të shkojnë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit.
Kujtojmë që vendimi i Edi Ramës për të shpërndarë 8 miliardë lekë vjen këtë fillim viti të ri duke u munduar që të “blejë” mendjen e qytetarëve të cilët pas rreth 4 muajsh do t’i drejtohen kutive të votimit për zgjedhjet lokale.
Për shkak të rritjes së inflacionit dhe krizës ekonomike familjet shqiptare dhe veçanërisht të moshuarit kanë pasur vështirësi për të siguruar ushqimet e mbijetesës. Ndërsa shumë familje të tjera për shkak të rritjes galopante të çmimeve e kanë të pamundur për të mbushur tavolinën natën e ndërrimit të viteve, ndërsa e paprecedent është niveli i shpopullimi të vendit nga emigracioni.
