Këshilltarja e ministrit për Komunitete dhe Kthim në Qeverinë e Kosovës, Rada Trajkoviç ka shtruar tre pyetje ndaj presidentit Aleksandër Vuçiç lidhur me barrikadat në veri të Kosovës, pas konferencës së fundvitit që dha sot presidenti serb.
“1. Pse ‘Lista Serbe u bë naive për katër baza’ në veri? 2. A nuk ishin të vetëdijshëm rreth “përballjes së mundshme katastrofale me NATO-n” përpara se të nxisnim njerëzit në barrikada dhe të ngrinim gatishmërinë luftarake? 3. Cili ishte në fakt qëllimi i barrikadave dhe interesi (privat) i kujt ishte?”, ka pyetur Trajkoviç në Tëitter.
Gjatë krizës në barrikada, në mesin e dhjetorit, Rada Trajkoviç u ndalua rrugës për në Kosovë ku e priste në takim ambasadori i SHBA-së në Kosovë, Jeffrey Hovenier. Akoma më gjatë u ndalua gjatë rikthimit për në Serbi. Ajo është transportuar nga kufiri në spitalin e Prokuplës. Autoritetet shtetërore nuk dhanë shpjegim zyrtar për këtë ndalim, ndërsa Trajkoviç, e cila me profesion është mjeke, publikoi foto të të nxirave në trup, duke pretenduar se ato ishin pasojë e qëndrimit gati 24 orësh në kufi me Merdaren. Partia Radikale Serbe e Vojisllav Sheshelit publikoi informacione në YouTube se ku punojnë tre fëmijët e rritur të Trajkoviçit. Ajo më vonë njoftoi në Twitter se vajza e saj u ndalua në mënyrë të pashpjegueshme në aeroportin “Nikola Tesla” të Beogradit, por se ajo arriti të kthehej në Londër.
