Janë hequr barrikadat e fundit të vendosura në Veri të Kosovës, përkatësisht në dy pikat kufitare Jarinjë dhe Bërnjak.
Policia njofton se largimi i barrikadave është bërë në formën siç ato ishin vendosur dhe qarkullimi në dy pikat kufitare do të vijojë normalisht.
“Bazuar në informacionet e deritanishme, është bërë largimi i barrikadave në formën siç ato ishin vendosur, dhe pas kësaj është vlerësuar edhe hapja e dy pikë-kalimeve kufitare Jarinje dhe Bërnjak, të cilat sot (30.12.2022) në orët e pasdites janë hapur për qarkullim. Zyrtarët policorë në veri të vendit dhe në këto dy pikë kalime kufitare, do të vazhdojnë me realizimin e detyrave dhe autorizimeve ligjore në interes të rendit publik dhe kushtetues. Liria e lëvizjes së lirë, parandalimi i akteve kriminale dhe ofrimi i sigurisë janë në dobi të të gjithë qytetarëve dhe për këtë Policia e Kosovës në vazhdimësi do të angazhohet duke bashkëpunuar ngushtë me institucionet vendore dhe ndërkombëtare”, njofton policia.
Hiqen barrikadat:
Veriu i Kosovës është liruar zyrtarisht nga barrikadat. Mjetet e artilerisë së rëndë që ishin vendosur në fshatin Zubq në Zubin Patok janë hequr. Gjithashtu edhe në pikat kufitare Jarinjë dhe Bërnjak është rikthyer qarkullimi i automjeteve dhe udhëtarëve. Në pikat e tjera kufitore nuk ka pritje të gjata, as në hyrje apo dalje të Kosovës.
I vetmi incident i shënuar ditën e sotme është sulmi ndaj një shqiptari të Kosovës në Leposaviç, të cilit i janë heur targat e makinës. Vendimi për të larguar barrikadat është zbatuar që ditën e djeshme. Qarkullimi i qytetarëve është kthyer në normalitet në fshatin Rudarë, i cili gjendet në komunën e Zveçanit, në komunën e Leposaviçit dhe të Zubin Potokut. Ndërkohë ambasadori i SHBA në Beograd ka bërë me dije se pas festave të fundvitit do të nisë puna intensive për dialogun Kosovë-Serbi në mënyrë që të mos përsëritet një situatë e ngjashme.
