Dalin detaje të reja nga shpërthimi me tritol në banesën e efektivit të policisë, Valter Serra në Shkodër.
Burimet mediatike bëjnë me dije se efektivi Valter Serra ka qenë i vetëm në banesë në momentin kur ka ndodhur shpërthimi me tritol. Ngjarja ka ndodhur në orën 02:00 të mëngjesit të sotëm, ndërsa dyshohet se lënda plasëse është vendosur nga dy persona të maskuar të cilët janë larguar më këmbë nga vendi i ngjarjes.
Në banesën ku ndodhi shpërthimi nuk ka kamera sigurie ndërsa policia ka sekuestruar kamerat e sigurisë në kryqëzime të ndryshme për të arritur në identifikimin e autoreve dhe me pas gjetjen e kapjen e tyre.
Efektivi Serra punon prej afro 3 vitesh në policinë vendore e Shkodrës duke shërbyer si patrullë. Pas ngjarje polici Serra ka deklaruar se nuk e ka idenë se përse është vendosur sasia e tritolit në banesën dhe makinën e tij. Serra është shprehur se nuk ka patur konflikte me persona të ndryshëm apo ndonjë kërcenim të mëparshëm.
Efektivi i policisë tha se nuk e ka idenë se kush mund të jenë autoret e vendosjes se tritolit ndërsa ka kërkuar zbardhjen e plotë të ngjarjes. Ndërkohë policia dyshon se tritolit ndaj kolegut te tyre mund të jetë për shkak të detyrës.
Gjatë reagimit zyrtar, Policia bën me dije se ka siguruar prova për të identifikuar autorët e ngjarjes por deri tani asgjë konkrete.
NJOFTIMI I POLICISE:
“Më datë 30.12.2022, rreth orës 02:00, në fshatin Bardhaj, ka shpërthyer një sasi lënde plasëse, para banesës së shtetasit V. S., me detyrë punonjës i Patrullës së Përgjithshme të Komisariatit të Policisë Shkodër.
Si pasojë është dëmtuar automjeti tip “Volkswagen” në pronësi të këtij shtetasi dhe janë shkaktuar dëmtime të lehta në banesën e tij.
Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon punën për zbardhjen e rrethanave të kësaj ngjarjeje.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve“, njofton Policia.
