Një zyrtar i Forcave Kufitare të Britanisë së Madhe, i punësuar nën juridiksionin e Home Office është arrestuar nga policia, pasi janë ngritur dyshime se ai ka mbërritur në ishull 20 vite më parë si emigrant illegal dhe ka gënjyer në deklaratat e tij për çështjen e azilit për vendin e lindjes.
“Më 6 dhjetor, Njësia Kundër Korrupsionit të Home Office arrestoi katër anëtarë të stafit të imigracionit me dyshimin për sjellje të pahijshme në poste publike dhe komplot për të vjedhur. Ata janë liruar në pritje të hetimeve të mëtejshme dhe janë pezulluar menjëherë. Një oficer i arrestuar si pjesë e komplotit ishte arrestuar më parë dhe liruar me kusht për veprat e imigracionit. Ne presim standardet më të larta të stafit tonë. Sapo jemi të vetëdijshëm për akuzat për keqbërje, ato hetohen me rigorozitet dhe ne nuk hezitojmë të ndërmarrim veprime vendimtare”, tha një zëdhënës i Home Office, lidhur me rastin në fjalë.
Mediat britanike që kanë publikuar rastin në fjalë nuk japin detaje nëse djali në të 30-at është apo jo shtetas shqiptar.
Por në artikujt e tyre nënvizohet se oficeri i vënë në pranga ka mbërritur në Britani si refugjat nga një shtet i Ballkanit dhe theksojnë se në vitet 1999-2000, “dhjetëra shqiptarë u hoqën sikur ishin nga Kosova, e cila ishte në luftë me Serbinë, për të marrë azil”, ndaj nuk përjashtohet mundësia që të kemi të bëjmë me një shtetas shqiptar.
Sipas DailyMail i arrestuari dyshohet për shkelje të rregullave të emigracionit dhe e cilëson rastin një zbulim të turpshëm për Home Office, e cila ka për detyrë të ndalojë emigrantët që mbërrijnë ilegalisht në Mbretërinë e Bashkuar.
Në krahun tjetër Home Office e ka pezulluar zyrtarin, i cili besohet të jetë pranë të 30-ave, që prej momentin të parë kur dyshimet rreth tij dolën në pah.
“Të lejosh një emigrant të supozuar të paligjshëm të depërtojë në radhët e agjencisë tonë kufitare është mjaft e turpshme”, tha një burim nga Home Office për The Sun.
“Me sytë e të gjithë vendit që drejtohen nga Forca Policore Kufitare në këto kohë, kjo është gjëja e fundit për të cilën ata duhet të shfaqeshin në sytë e opinionit publik”, shtoi ai.
“Mendohet se zyrtari i dyshuar mbërriti në Britaninë e Madhe rreth 20 vjet më parë, kur ishte adoleshent, i ardhur nga Ballkani. Pretendohet se ai gënjeu se nga cili vend vinte për t’u siguruar që mund të qëndronte në Britani”, shkruan LBC.
Emigrantët shqiptarë janë vënë në shënjestër të strategjisë kundër migracionit të paligjshëm të qeverisë britanike, me djemtë e rinj nga vendi ynë që mendohet se përbëjnë rreth 13,000 nga 45,000 njerëz që kaluan Kanalin me gomone gjatë vitit 2022.
