Një incident ka ndodhur në Librazhd ditën e djeshme. Mësohet se një person ka sulmuar fizikisht dhe verbalisht tre efektivë policie në kohën që ata po kryenin procedurën e shoqërimit të tij në komisariat.
Mësohet se policia ka marrë një denoncim nga disa qytetarë për bezdisjen që po ju shkaktonin dy persona në gjendje të alkoolizuar. Patrulla ka shkuar rreth orës 15:30 në vendngjarje për të bërë shoqërime për në Komisariat.
Sipas informacioneve shtetasit Kujtim Faqolli dhe Shpëtim Duka janë konfliktuar në ambientet e lokalit. Kur ka mbërritur policia në vendngjarje njëri prej tyre ka refuzuar shoqërimin për në Komisariatin e Librazhdit dhe ka tentuar të largohet.
Në vendngjarje policia ka hasur në kundërshtimin e personit në fjalë për disa minuta dhe e ka shoqëruar për në ambientet e policisë. Ai në gjendje të dehur ka reaguar dhunshëm ndaj tre efektivë të patrullës së policisë duke i kërcënuar edhe verbalisht.
Njoftimi i Policisë:
Sqarim i Drejtorisë Vendore të Policisë Elbasan.
Në lidhje me një lajm të publikuar në media, në të cilin pretendohet se një punonjës policie ka goditur me grusht një qytetar, në ambientet e Komisariatit të Policisë Librazhd, sqarojmë opinionin publik se lajmi është i pavërtetë.
Më datë 27.12.2022, rreth orës 15:15, është njoftuar salla operative e Komisariatit të Policisë Librazhd, për një konflikt.
Menjëherë, shërbimet e Policisë kanë shkuar në adresën e dhënë, ku kanë konstatuar shtetasin K. F. që kishte telefonuar dhe shtetasin Sh. D. që ishte konfliktuar me shtetasin F. K.
Në momentin që Patrulla e Përgjithshme do të shoqëronte shtetasin Sh. D., 52 vjeç, banues në Hotolisht, ky shtetas i ka kundërshtuar me forcë punonjesit e Policisë, të cilët kanë kërkuar përforcime dhe më pas e kanë shoqëruar në Komisariat shtetasin Sh. D.
Në lidhje me këtë ngjarje po vijojnë veprimet procedurale nga oficeri i Policisë Gjyqësore i Prokurisë pranë Gjykatës së Rrethit Gjyqësor Elbasan.
