Me veshje ushtarake, të ngjashme me atë të Volodymyr Zelenskyt në Ukrainë, ka zgjedhur ti drejtohet sot ushtarëve në fjalimin vjetor para pjesëtarëve të Forcës së Sigurisë së Kosovës.
“FSK-ja është e gatshme dhe e përgatitur”, ishte mesazhi i Presidentes në një kohë kur tensionet në Veri të Kosovës janë shtuar ditët e fundit, me serbët që kanë ngritur barrikada edhe në lagjet e Mitrovicës, ndërsa bllokuan mbrëmjen e djeshme edhe pikën e kalimit kufitar të Meradrës, duke sulmuar shqiptarët që ktheheshin për festa në atdhe.
Gjatë fjalimit të saj në Komandën e Forcave Tokësore në Istog, Osmani se në kohën kur arkitektura e sigurisë po sfidohet e atakohet, forcimi i kapaciteteve mbrojtëse është domosdoshmëri.
“Viti që po lëmë pas u përcoll me sfida jo vetëm për ne, por edhe për botën. Duhet të jemi të vetëdijshëm që sfidat do të rriten krahas me përpjekjet për ta sfiduar paqen dhe rendin botëror nga regjimet autoritare hegjemoniste. Prandaj, më shumë se kurrë na duhet devotshmëri ndaj atdheut, vigjilencë e përkushtim që Republikës t’i bëhemi gardianë”, tha Osmani.
Komandantja supreme para ushtarëve të vendit theksoi se betimi që ushtarët kanë dhënë për t’i shërbyer atdheut është më i shenjtë se çdo gjë tjetër, duke lënë të kuptohet se Kosova është gati për çdo situatë.
“Kjo gatishmëri e juaja për ta mbrojtur vendin nga çdo rrezik na bën krenar secilin. Është nder e privilegj sa herë jam në mesin tuaj. Mbi të gjitha djemtë e vajzat e forcës sonë janë të gatshëm për të mbajtur integritetin territorial e sovranitetin e shtetit tonë. Ju shquheni për përkushtimin ndaj vendit, për nivelin profesional, për disiplinë e përkushtim ndaj detyrës, për nderin ndaj vendit tuaj. Kjo na bën krenar ne si shtet”, u shpreh presidentja.
Sakaq sot bëhen 19 ditë që prej ngritjes së barrikadave në Veri, ndërsa në mesditë ish-polici Dejan Pantiç, i cili u kthye në motiv të përplasjes Serbi-Kosovë është liruar nga burgu.
Avokati i tij, Nebojsha Vllaiç, ka konfirmuar për REL-in se klientit të tij i është zëvendësuar masa e paraburgimit me “arrest në shtëpi”.
“Policia e Kosovës është e obliguar që të transferojë Patiçin në adresën ku ai jeton”, tha ai.
Pantiç u arrestua më 10 dhjetor në pikën kufitare të Jarinjës, pasi ishte i dyshuari kryesor për organizmin e “sulmit terrorist” të 6 dhjetorit ndaj zyrtarëve të Komisionit Qendror të Zgjedhjeve.
