Forca të shumta të policisë së shtetit, me angazhimin edhe të FNSH-së dhe repartit RENEA kanë zbarkuar në orët e para të mëngjesit të sotëm në banesën e të shumëkërkuarit të drejtësisë, Ervis Martinaj.
Në rrjet po qarkullojnë pamje që tregojnë se dhjetëra makina të FNSH-së dhe RENEA-s kanë rrethuar shtëpinë e Martinajt në Fushë-Kuqe të Kurbinit, ku edhe banon familja e tij.
Ka qenë Gjykata e Kurbinit ajo që ka marrë vendimin dhe ka dhënë urdhërin për të kontrolluar banesën e Martinajt dhe të familjarëve në kuadër të hetimeve për operacionin “Plumbi i Artë”.
Nuk ka ende detaje nga operacioni që duket të jetë në zhvillim e sipër, ndërsa fati i Ervis Martinajt mbetet ende mister. “Mbreti” i lojërave të fatit që është zhdukur pa gjurmë prej 11 gushtit 2022, mbrëmjen kur ai u shpall dhe u denoncua i zhdukur nga familjarët e tij.
Hera e fundit që Martinaj është parë gjallë ka qenë një hotel në Durrës, ku ai është kapur nga kamerat e sigurisë i shoqëruar nga e dashura dhe ish-efektivi i operacionales, Jeton Lami, i cili tashmë gjendet pas hekurave.
Ditët e fundit policia ka zhvilluar kontrolle edhe në Elbasan, Vlorë dhe Durrës.
