Prokuroria e Kurbinit ka vendosur të zgjasë edhe me 3 muaj të tjerë afatin e hetimit për ish-efektivin e forcave Operacionale, Jeton Lami duke arsyetuar se do të kryejë veprime të tjera hetimore.
Lami është vënë në pranga për akuzën e shpërdorimit të detyrës, pasi shoqëronte Ervis Martinajn pak ditë përpara se ky i fundit të zhdukej.
Ai është kapur nga kamerat e sigurisë në një hotel në zonën e plazhit në Durrës, së bashku me “mbretin” e lojërave të fatit dhe të dashurën e tij, një vajzë të njohur të shoëbiz-it.
Edhe pse dëshmia e tij konsiderohej kyçe në zbardhjen e rastit, Lami ka refuzuar japë shpjegime për hetuesit, duke detyruar Prokurorinë që në këto kushte të shtyjë hetimin.
Ervis Martinaj ishte person në kërkim ndërkombëtar, pasi Nuredin Dumani e akuzoi atë se i kishte premtuar 500 mijë euro që të ekzekutonte rivalin e tij Endrit Dokle, kur familja denoncoi humbjen e kontakteve me të.
Prej gjashtë muajsh fati i njeriut të cilësuar si “mbreti i lojërave të fatit”, vijon të mbetet i mbuluar nga misteri dhe policia ende nuk ka një përgjigje nëse Ervis Martinaj e ka inskenuar ngjarjen, apo është rrëmbyer e vrarë nga kundërshtarët.
