Një spirale vrasjesh dhe atentatesh mes Tiranës dhe Athinës, që dyshohet se ka nisur pas humbjes së një ngarkese prej 700 kg kanabis dhe ka marrë deri tani 4 jetë njerëzish (Edmond Papa, Aleksandër Sadikaj, Kreshnik Çerçizaj e Armando Organja), është duke u hetuar si nga policia shqiptare dhe nga ajo greke.
Teksa në mediat greke qarkulloi lajmi se urdhri për ekzekutimin e dy shqiptarëve në një lokal të lagjes Nea Smyrni mund të ketë ardhur nga burgjet (më i përfoluri ai i Domokos) dhe ka lidhje me larjen e hesapeve mes shqiptarëve, policia greke ka zhvilluar sot një aksion pikërisht në institucionet e vuajtjes së dënimit.
Sipas Protothema.gr, janë kontrolluar gjithsej gjashtë qeli me 13 të burgosur shqiptarë në burgun e Chanias, në Kretë.
Operacioni ka qenë “top-secret” dhe është reealizuar në orët e para të mëngjesit të së premtes me urdhër të Prokurorisë së Krimeve.
Në qelitë e “baronëve” shqiptarë të krimit kanë zbarkuar agjentët e Attica Security (rajoni i Atikës në Athinë) i kryesuar nga oficerët me përvojë të Krimeve në bashkëpunim me Departamentin e Vrasjeve, një ekip nga EKAM dhe një qen nuhatës droge.
Operacioni u mbyll ashtu sicc u zhvillua në fshehtësi ekstreme pa informimin paraprak të autoriteteve të burgut, në 6 qeli me 13 të burgosur shqiptarë, mes tyre dhe në qelinë e të përfolurit si lideri i mafies shqiptare në Greqi, Klodian Lekocaj.
“Gjithçka është bërë në shkallë konfidenciale”, ka thënë një oficer i ELAS për Protothema.gr.
“Policia nuk ka sindroma fobike dhe ndërhyn në kohën dhe vendin që i sheh të dobishme dhe të nevojshme. Në Burgjet e Chanias të Kretës ka vite që nuk ka ndodhur një ndërhyrje e tillë policore”, ka rrëfyer ai.
