Bashkia e Kuçovës është një nga katër bashkitë ku opozita do të prezantohet në zgjedhjet lokale të 14 Majit me një kandidat që vjen nga radhët e Partisë së Lirisë.
Është ish-deputeti Lefter Maliqi ai që mori besimin e votuesve në Primare dhe do të garojë përballë kandidatit të mazhorancës për të tentuar që të kthejë djathtas një bastion të majtë.
Vlerat dhe peshën elektorale të Maliqit e ka vlerësuar edhe vetë kreu i PL, Ilir Meta gjatë një takimi të zhvilluar sot në Kuçovë, ku e konsideroi një “vullkan” kur vjen puna tek zgjedhjet.
“Lefteri është vullkan, edhe kur ka qenë kryetar komune ka bërë gjithçka për të zhvilluar zonën, edhe në parlament, pavarësisht se nuk isha i lumtur, por ishte i vetmi opozitar aty brenda”, tha Meta.
Kreu i PL shtoi se nga 15 maji Bashkia e Kuçovës do jetë më e hapur për qytetarët me Lefter Maliqin në krye.
“Nga agimi i 15 majit, me Lefter Maliqin në krye, do jetë e hapur Bashkia e Kuçovës. E hapur do jetë Tirana me Belind Këlliçin, Elbasani me Luçiano Boçin. Nuk mbahen me presione dhe gjoba e shantazhe që i bëhen qytetarëve. 350 mln euro është buxheti i Bashkisë së Tiranës, por asnjë nuk e di emrin e kryetarit të këshillit të bashkisë Tiranë. 70 mln euro paga bashkia e Tiranës”, nënvizoi ai.
Në vijim, Meta u ndal te problemet e përgjithshme të vendit, duke vendosur theksin te pagat e ulëta të mësuesve, mjekëve, policëve apo profesionistëve të tjerë në një kohë që miliona euro vidhen nga qeveria nëpërmjet aferave korruptive si ajo e inceneratorëve.
“Lekët e qytetarëve të Tiranës shkojnë tek inceneratorët. Në krye të kësaj hajdutërie është Edi Rama. Vete kilometric i rrugës 15 mln euro, 4 herë më shumë se në vendet e BE-së. Me statistikat e BE-së, një mësues në Shqipëri paguhet 4200 euro në vit. Një mësues në Malin e Zi, paguhet 9900 euro në vit. Mësuesi në Velipojë merr 370 euro, mësuesi në Ulqin, merr 900 euro në muaj. Pse? Kur GDP për frymë është njësoj?! Këtu shkojnë për investime publike dhe bëhet shumë herë më i shtrenjtë km i rrugës se në Francë. Shpopullimi është plan në Shqipëri, jo rastësi. Shkatërron portin kombëtar për të bërë banesa… por shqiptarët i kanë ndërtuar vetë, kjo është vjedhje e pasurive kombëtare, për qëllime korruptive”, u shpreh ai.
