Vrasja e tre pjesëtarëve të komunitetit kurd në Paris nga një racist i ekstremit të djathtë që sapo kishte dalë nga burgu, ka ndezur një valë të dhunshme protestash anembanë Francës.
Komuniteti kurd ka vërshuar në rrugë duke u përleshur me policinë që përpiqet të ruajë rendin dhe sigurinë.
Edhe pse Presidenti Emmanuel Macron nxitoi të dënonte sulmin e armatosur ndaj kurdëve në zemër të Parisit, asgjë nuk duket të ndalë zemërimin e kurdëve.
“Kurdët e Francës kanë qenë objektivi i një sulmi të tmerrshëm në zemër të Parisit. Mendime për viktimat, për njerëzit që po luftojnë për të jetuar, për familjet dhe të dashurit e tyre. Njohje për forcat tona të rendit për guximin dhe qetësinë e tyre”, tha Macron.
Sipas mediave franceze sulmi me armë ndodhi në Qendrën Kulturore Kurde Ahmet-Kaya, në rrugën 16 Rue d’Enghien. Pati gjithashtu të shtëna në një restorant dhe në një parukeri, sipas Alexandra Cordebard që ishte e pranishme në vendngjarje.
Agresori është William M. (një shofer treni në pension 69-vjeçar nga Franca), i cili gjithashtu sulmoi një kamp migrantësh vitin e kaluar dhe kishte dalë nga qelia e burgut vetëm dhjetë ditë më parë.
Një grua dhe dy burra u vranë dhe të tjerë u plagosën rëndë, duke shkaktuar ‘panik total’ ndërsa gjakderdhja u kthye në rrugët e kryeqytetit francez.
Një oficer hero ndërhyri për të shkëputur pistoletën e kalibrit të vogël nga vrasësi i tërbuar.
Hetuesit besojnë se të shtënat mund të kenë shënjestruar qëllimisht komunitetin kurd. Agresori është plagosur në fytyrë dhe ndodhet në paraburgim. Pas arrestimit të tij një dëshmitar tha: “Ishte i qetë, duket sikur s’mendonte asgjë. Nuk është normale që dikush që sapo ka vrarë njerëz është i qetë”.
Dëshmitari okular Mehmet Dilek tha se ai fillimisht dëgjoi të shtëna armësh dhe më pas të qara që vinin nga brenda një dyqani berberie përballë qendrës kulturore. “Kalimtarët e rastit e ulën në tokë personin e armatosur kur iu desh të mbushte sërish armën e tij të zjarrit”, shtoi Dilek.
“Mund të jetë tronditëse për dikë që nuk ka pasur kurrë një shqetësim në jetën e tyre. Por ne u rritëm nën kërcënimin e armëve dhe bombave, kështu është jeta për ne kurdët”, vazhdoi ai.
Një punëtor ndërtimi i cili ishte në një punë aty pranë përshkroi se kishte parë sulmuesin të shkonte fillimisht në qendrën kulturore, pastaj në restorant dhe më pas në parukeri.
Ndërkohë tensioni u përshkallëzua dhe dhuna shpërtheu kur ministri i Brendshëm Gerald Darmanin po fliste me gazetarët aty pranë për situatën e rëndë pas sulmit.
Ardhja e Gerald Darmanin duket se ka transformuar atmosferën. Këto incidente nisën kur turma u përplas me një kordon forcash sigurie që mbronin Ministrin e Brendshëm, i cili kishte dalë në vendngjarje për të dhënë një informacion mbi hetimin dhe për të folur me gazetarët.
Fishekzjarre fluturuan në rrugën du Faubourg Saint-Denis drejt policisë, e cila përdori gaz lotsjellës për të shpërndarë demonstruesit.
Ndërkohë, Darmanin tha se sulmuesi kishte në shënjestër të qartë të huajt, por se policia nuk ka prova në këtë fazë që ai synonte në mënyrë specifike të lëndonte kurdët.
#Fusillade à #Paris : les espoirs s’échauffent. Un groupe de personnes chargent les forces de l’ordre et lancent des projectiles. La manifestation jusque là pacifique dégénère. @le_Parisien @LeParisien_75 pic.twitter.com/pbzU6uGgdx
— Paul Abran (@abran_paul) December 23, 2022
Anëtarët e tronditur të komunitetit kurd në Paris thanë se ishin paralajmëruar së fundmi nga policia për kërcënimet ndaj objektivave kurde dhe kërkuan drejtësi pas të shtënave.
“Një grup njerëzish shtyjnë policinë dhe lëshojnë mjete piroteknike. Demonstrata e mëparshme paqësore degjeneroi në dhunë”, raporton një gazetar i “Le Parisien”.
Një demonstratë po mbahet edhe në Marsejë, ku kurdët valëviten flamuj dhe mbajnë fjalime.
