Dy ditë më para, policia e Fierit, arrestoi shtetasin Armando Tërnova dhe shpalli në kërkim Nehat Rizvani.
Gjatë një operacioni të zhvilluar, këta 2 shtetasit po transportonin lëndën narkotike, me një automjet tip “Audi Q7″, ku pasi kanë parë që po ndiqeshin nga shërbimet e Policisë, kanë braktisur automjetin dhe janë larguar.
Blutë kanë sekuestruar 3 thasë me lëndë të dyshuar narkotike cannabis sativa, me peshë rreth 85 kg.
Ndërkaq sot policia ka reaguar sërish duke thënë se ka arrestuar shtetasin V. R., 26 vjeç, banues në Hamil, i përfshirë në këtë veprimtari kriminale si pronari i automjetit tip “Audi Q7”.
“Në vijim të operacionit policor antidrogë të koduar “Hamil”, i zhvilluar nga Seksioni për Hetimin e Narkotikëve, në bashkëpunim me Komisariatin e Policisë Fier dhe Forcën e Posaçme “Shqiponja”, për goditjen e veprimtarisë kriminale në fushën e narkotikëve, janë kryer veprime të pandërprera hetimore për dokumentimin e plotë të kësaj veprimtarie kriminale, identifikimin dhe kapjen e personave të tjerë të përfshirë.Në kuadër të këtij operacioni, nga specialistët e Seksionit për Hetimin e Narkotikëve të DVP Fier, u kap dhe u ndalua shtetasi V. R., 26 vjeç, banues në Hamil, i përfshirë në këtë veprimtari kriminale. 26-vjeçari është pronari i automjetit tip “Audi Q7”, me të cilin shtetasit A. T., 25 vjeç (i arrestuar gjatë operacionit) dhe N. R., 31 vjeç (i shpallur në kërkim), po transportonin 3 thasë më lëndë të dyshuar narkotike cannabis sativa, me peshë rreth 85 kg”, njofton policia.
Vijojnë veprimet hetimore për dokumentimin e plotë të kësaj veprimtarie kriminale, ndërsa materialet i kaluan Prokurorisë, për veprime të mëtejshme.
