Ka ndërruar jetë në spitalin e Traumës, 17-vjeçari Elio Hamiti, që u përplas me makinë nga ish-kryebashkiaku i Himarës Vasil Bollano, pasditen e djeshme në Llogara. I mituri nuk ka mundur t’i mbijetojë plagëve të marra pas përplasjes.
Policia ka rrestuar ish-kryebashkiaku i Himarës, Vasil Bollano për veprën penale “Shkelja e rregullave të qarkullimit rrugor”, me pasojë vdekjen.
“Specialistët e Qarkullimit Rrugor arrestuan në flagrancë shtetasin V. B., 66 vjeç, banues në Himarë.
Ky shtetas, ditën e djeshme, rreth orës 17:00, duke drejtuar automjetin, në aksin rrugor Orikum-Llogara, në afërsi të fushës së sportit, ka aksidentuar shtetasin E. H., 17 vjeç, banues në Dukat, i cili lëvizte në këmbë.
Si pasojë e dëmtimeve të marra 17-vjeçari ka ndërruar jetë në Spitalin e Traumës, Tiranë.”- njofton policia.
Adoleshenti ishte duke kaluar rrugën dhe po shkonte drejt stacionit të autobusit nga fusha e futbollit. Ai u godit me makinë nga ish-kryebashkiaku Vasil Bollano. Sipas dëshmitarëve, goditja ka qenë tepër e fortë dhe i riu është dërguar menjëherë në spital. I mituri ishte nisur të shkonte te gjyshja pasi donte ta shoqëronte atë gjatë natës.
Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme, për veprën penale “Shkelja e rregullave të qarkullimit rrugor”, me pasojë vdekjen.
