Detaje të reja janë publikuar nga mediat greke në lidhje me vrasjen e dyfishtë të ndodhur në një lokal në Nea Smyrni, ku u ekzekutuan Kreshnik Çerçizaj dhe Armand Organja.
Dy shqiptarët (44 dhe 41 vjeç) u ekzekutuan mbrëmjen e të dielës në Athinë për shkak të prishjes së pazareve të drogës, ku dyshohet se një spirale vrasjesh është hapur pasi ka humur një ngarkesë prej 700 kg kanabis, e cila mendohet se ka sjellë edhe atentatin në Tiranë ndaj biznesmenit Edmond Papa.
Sakaq, një pistë e re hetimi ka dalë në dritë për autoritetet greke, pasi policia ka informacion nga një sërë biznesmenësh në zonë, se Kreshnik Çerçizaj, i cili dyshohet se ishte dhe objektivi i atentatit, frekuentonte çdo ditë pothuajse të gjitha dyqanet e zonës për mbledhje te ardhurash, ose siç njihet ndryshe “gjobvënie”.
Ajo që e bën këtë informacion nga një thashethem në një element të dosjes së çështjes, është se tashmë ka njerëz që kanë dashur t’ia raportojnë këtë dijeni autoriteteve dhe rrjedhimisht mundësia që të ketë qenë një ekzekutim nga një rrjet rival gjobëvënësish që pretendojnë kontrollin mbi zonën e Nea Smyrni.
Kjo pistë hetimore merr peshë më të madhe pa përjashtuar plotësisht mundësinë e larjes së hesapeve për drogë, edhe për shkak të së kaluarës kriminale të viktimës.
Nga autoritetet konsiderohet e sigurt se përveç vrasësit ka pasur edhe bashkëpunëtorë, si një kamerier, por edhe një person që do të priste në një mjet arratisjeje, pasi menjëherë pas krimit autori u arratis duke vrapuar mes turmës në panik.
Ajo që me siguri shqetëson autoritetet është zgjedhja e autorit për të hapur zjarr në një lokal plot me njerëz, duke mos marrë parasysh plotësisht pasojat.
