Ministrja e Jashtme Olta Xhaçka dhe homologu grek Nikos Dendias konfirmuan nga Tirana se ka një dakordësi mes palëve për ta zgjidhur çështjen e detit në Hagë.
Xhaçka u shpreh se mes dy vendeve ka mirëkuptim për të gjetur zgjidhje për të gjitha çështjet dhe një ndër to është edhe marrëveshja e detit. Ministrja theksoi se ka vullnet për kompromis për referimin e kësaj çështjeje në Gjykatën ndërkombëtare.
“Kemi mirëkuptim për të trajtuar dhe për të kërkuar zgjidhje për të gjitha çështjet, një nga ajo, ishte dhe marrëveshja me detit, të dyja palët kanë vullnetit për një kompromis për referimin e çështjes Gjykatën Ndërkombëtare”, tha Xhaçka në një deklaratë të përbashkët me Dendias, pas një takimi dypalësh.
Kryediplomati grek konfirmoi po ashtu se diskutuan gjithashtu “në nivel politik për marrëveshjen që ne kemi për një çështje shumë të rëndësishme, marrëveshjen në parim para dy vitesh që të kalojmë në një kompromis në mënyrë që të dërgojmë çështjen në Gjykatën e Hagës për kufirin”.
Ai u ndal dhe te tensionet në Veri të Kosovës, ndërsa theksoi se duhet dialog mes Prishtinës dhe Beogradit. Po ashtu, tha se “kemi rënë dakord në parim që të bëjmë një program për mbrojtjen e lumit Vjosa”.
Ligji i luftës, bashkëpunimi dypalësh, marrëveshja për pensionet ishin gjithashtu tema, për të cilat diplomatët konfirmuan se ishin pjesë e diskutimeve gjatë takimit.
Parlamentit grek, më 20 janar 2021 miratoi projektligjin për zgjerimin e ujërave territorialë të vendit nga 6 në 12 milje në Detin Jon. Ky vendim u shoqërua me debate dhe reagime të shumta në Shqipëri, në lidhje me atë se sa mund ndikojë vendimi i Greqisë në kufirin detar të Shqipërisë.
