Kryetari i Partisë Demokratike, Sali Berisha tha se ajo që u zhvillua në rrugën “Myslym Keta” në kryeqytet, ishte një dramë.
Gjatë fjalës së tij në mbledhjen e grupit parlamentar të PD-së, Berisha u ndal te shembja e pallatit te “Myslym Keta”, që hasi në kundërshtinë e banorëve.
“Siç e shihni, çdo ditë këtu, kryen akte antikushtetuese, antiligjore, nga një qeveri që në raport me ligjin, rregullin dhe rendin, sillet si një bandë dhe jo si një përfaqësi e qytetarëve shqiptarë. Në çdo veprim, spikat qartësisht vullneti i tyre i sëmurë për të dhunuar Kushtetutën, ligjin, për të dhunuar qytetarët dhe të drejtat e tyre. Ajo që u zhvillua në rrugën Myslym Keta, ishte një dramë e atyre banorëve, e krijuar nga tërmeti, por e rënduar në mënyrë çnjerëzore nga qeveritarët vendorë dhe qendrore. Pasi pabesisht zgjodhën pragun e festave për të përdorur forcën, për të përdorur buldozerë, për të përdorur nxjerrjen me forcë, ndërkohë që ata banorë kishin mirëkuptim për prishjen e pallatit, por kërkonin siguri, që çdo njeri normal kërkon për banesën e tij. Sa do marrim, si do e marrim dhe kur do e marrim”, tha Berisha.
“U trajtuan sikur të ishin kavie dhe jo qytetarë të një vendi, nga një kryetar bashkie që nga mëngjesi deri në darkë, mendon se si të vjedhë taksat, tarifat, fondet e qytetarëve të Tiranës”, shtoi ai.
